सोमबारदेखि सवारी साधनमा विद्युतीय नम्बर प्लेट (इम्बोस्ड)  

फोटोः गुगल

४,भदौँ,हेटौँडा । यातायात व्यवस्था विभागले  सोमबारदेखि सवारी साधनमा विद्युतीय (इम्बोस्ड) नम्बर प्लेट राख्न शुरु गर्ने भएको छ  । सोमबार बिहान विभागमा  विशेष कार्यक्रमको आयोजना गर्दै  भौतिक पूर्वाधार तथा यातायात मन्त्री वीरबहादुर बलायरले सवारीमा इम्बोस्ड नम्बर  प्लेट राख्ने कामको शुभारम्भ गर्नेछन ।
इम्बोस्ड नम्बर प्लेट राष्ट्रपति, सरकारी, व्यावसायिक र निजी गरी चार प्रकारका हुनेछन् । आगामी पाँच वर्ष भित्र २५ लाख सवारी साधनमा विद्युतीय नम्बर  प्लेट राख्ने र  सवारी साधनमा इम्बोस्ड नम्बर प्लेट राखेपछि सवारी चोरी हुने समस्या र अपराधीक घटनामा कमी आउने विभागका प्रवक्ता डा टोकराज पाण्डेले बताए । 

इम्बोस्ड नम्बर प्लेट चम्किलो हुने हुदा इम्बोस्ड नम्बर प्लेट जडान गरेका सवारी साधनलाई पहिचान गर्न उपत्यका सहित उपत्यका बाहिर पाँच स्थानमा ‘रेडियो फ्रिक्वेन्सी आइडेन्टिफिकेसन केन्द्रको स्थापना गरिने पाण्डेले बताए । 
यो नम्बर प्लेट राख्न ठूला चारपांग्रे सवारीका लागि रु तीन हजार ६००, मझौला चारपांग्रे सवारीका लागि रु तीन हजार २००, ट्याम्पो, रिक्सालगायत तीनपांग्रे सवारीका लागि रु दुई हजार ९०० र मोटरसाइकललगायत सवारीका लागि रु दुई हजार ५०० दस्तुर बुझाउनु पर्ने छ ।