कपाल नकाट्ने विद्यार्थीको कपाल काट्दै चण्डिका मावि

६ पुस,हेटौंडा। विद्यालयमा अध्ययनरत विद्यार्थीलाई कपाल काट्ने भनेपनि कपाल काट्न अटेरसँगै मकवानपुरको एक सामुदायिक विद्यालयले विद्यार्थीको विद्यालय परिसरमै कपाल काट्ने अभियान सञ्चालन गरेको छ। 

मकवानपुरको मकवानपुरगढी गाउँपालिका-२ शिखरकटेरीमा रहेको चण्डिका माध्यामिक विद्यालयले विद्यालयमा अध्ययनरत विद्यार्थीको कपाल काट्ने अभियान सञ्चालन गरेको हो । 

'बालबालिकामा अनुशासन कपाल कटाई ' अभियान भन्ने मुल मन्त्रका साथ सोमबारबाट कपाल काट्ने अभियान सुरु भएको हो । विद्यालयको व्यवस्थापन समितिका अध्यक्ष युवा समाजसेवी राजकुमार गोलेको व्यक्तिगत खर्चमा कक्षा १ देखि १२ सम्मका छात्रहरुको कपाल काटिएको विद्यालयका सहायक प्रधानाध्यापक वीरबहादुर गोलेले बताएका छन।विद्यार्थीलाई अनुशासनको दायरामा ल्याउन विद्यालयमा नै कपाल काट्ने अभियान सुरु गरिएको गोलेले बताए । 

हेटौंडाबाट तीन जना कपाल काट्ने हजामलाई  विद्यालयमा नै उपस्थित गराई आफ्नै खर्चमा विद्यार्थीहरुको कपाल काट्ने कामको सुरुवात गरेको विद्यालयका अध्यक्ष गोलेले बताएका छन । विद्यालयमा नै यो कार्यक्रम नौलो भएको र यसलाई अभियानकै रुपमा लैजाने उनले बताए । कक्षा १ देखी १२ सम्मका लामा कपाल पाल्ने विद्यार्थीको कपाल काटी स्वास्थ्य र सफा देखिने गरी विद्यार्थी पठनपाठनमा आउने वातावरण सिर्जना गरेको उनले बताए।

पहिलो चरणमा सोमबार ७५ जनाको कपाल काटेको र आफु विद्यालयको अध्यक्ष रहुन्जेल यस अभियानलाई निन्तरता दिइने समेत गोलेले बताएका छन् । विद्यालयमा नै बोलाएर कपाल काट्दा केही विद्यार्थीहरले व्यवस्थापन समितिका अध्यक्षको कदमको स्वागत गरेका छन।