२ करोड ५० लाखको लगानीमा रिसोर्ट

२ भदौ, हेटौँडा । उत्तरी मकवानपुरको पर्यटकिय क्षेत्र थाहा नगरपालिकामा २ करोड ५० लाख रुपैँयाको लगानीमा सुविधा सम्पन्न रिसोर्ट संचालनमा आएको छ । थाहा–१३ बज्रबाराही भटवालका ललितसिं ठकुरी र अर्जुनसिं ठकुरीले आफ्नो गाउँमा सुविधा सम्पन्न रिसोर्ट संचालनमा ल्याएका हुन् ।

राजधानीमा आईटि क्षेत्रमा कार्यरत भाई अर्जुनको हौसलाबाट शान्त एवं ग्रामिण परिवेश रुचाउने प्रकृतिप्रेमी पर्यटकलाई लक्षित गरी रिसोर्ट संचालन गरेको सहकारीकर्मी समेत रहेका संचालक ललितले बताए । “कोलाहलपूर्ण वातावरणबाट दिक्क भई शान्त प्रकृतिमा रमाउन चाहने पर्यटकलाई लक्षित गरी आफ्नै गाउँमा रिसोर्ट संचालन गरेका हौं ।” चित्लाङ चन्द्रागिरी र दामन पालुङबीचमा पर्ने बज्रबाराहीमा यस्तो रिसोर्ट यो पहिलो हो । रिसोर्टमा ३० जनाको क्षमता रहेको छ ।

तरकारीको पकेट क्षेत्र मानिने बज्रबाराहीमा रहेको रिसोर्टले स्थानीय परिकारलाई विशेष प्राथमिकता दिएको जनाएको छ । पर्यटकिय क्षेत्र दामन पालुङको अवलोकन, नजिकका क्षेत्रमा पदयात्रा, भिलेज टुर, इन्द्रसरोबरमा बोटिङ, धार्मिक पर्यटकिय क्षेत्रको अवलोकन लगायतका प्याकेज राखेको होटल संचालनको ६ महिनामै पर्यटकको मन जितेको यस क्षेत्रका स्थानीयको भनाई छ । 
रिसोर्टले स्थानीय १० जनालाई रोजगारी दिएको संचालक ठकुरीको भनाई छ । नाकाबन्दीका कारण केही प्रभाव परे पनि अहिले व्यवसायमा सुधार हुँदै गएको जनाईको छ । राजधानीको कोलाहलबाट मुक्त हुन चाहने र तराई क्षेत्रका गर्मीका कारण शितलतामा रमाउन चाहने नेपाली र भारतिय पर्यटक रिसोर्टका मुख्य ग्राहक हुन भने विदेशीको समेत चासो बढेको संचालहको भनाई छ ।