चौघडाको नवजिवन क्लबको आफ्नै भवन, उपमेयर बानियाँले गरे शिलान्यास

२४ फागुन,हेटौंडा। हेटौडा-६ चौघडामा रहेको नवजिवन ज्योती क्लबको सामुदायिक भवन निर्माण कार्यको शिलान्यास गरिएको छ। हेटौडाका उपमेयर राजेश बानियाँ र हेटौडा-६ का वडाअध्यक्ष बिष्णु बहादुर दाहालले संयुक्त रुपमा सामुदायिक भवनको निर्माण कार्यको शिलान्यास गरेका हुन् ।

क्लबका अध्यक्ष राजकुमार बास्तोलाको सभाध्यक्षतामा सम्पन्न शिलान्यास कार्यक्रममा प्रमुख आतिथ्यता हेटौंडाका उपमेयर राजेश बानियाँको रहेको थियो। 

शिलान्यास कार्यक्रममा नेपाल पत्रकार महासंघ बागमती प्रदेश उपाध्यक्ष रुपेश दुलाल, वंशगोपाल बहुमुखी क्याम्पसका अध्यक्ष उज्ज्वल चौलागाई, वंशगोपाल माध्यमिक विद्यालयका प्रधानाध्यापक रमेश प्रसाद लामिछाने, स्थानीय समाजसेवी बद्री बहादुर पाठक, क्लबका सल्लाहकार गणेश कुमार श्रेष्ठ लगायतले मन्तव्य ब्यक्त गरेका थिए । कार्यक्रममा क्लबका पूर्व अध्यक्ष विजयकुमार श्रेष्ठले १० हजार रूपैयाँ सहयोगको प्रतिवद्धता व्यक्त गरेका छन् ।

कार्यक्रममा क्लबका पुर्व अध्यक्षहरु, ६ नम्बर वडा सचिव आमोद प्रसाद मैनाली, रानी सामुदायिक वन उपभोक्ता समूहका उपाध्यक्ष केशव धिताल, जनकल्याण बचत तथा ऋण सहकारी उपाध्याय श्यामप्रसाद भट्टराई, विभिन्न राजनैतिक दलका प्रतिनिधि, स्थानीयहरुको उपस्थिती रहेको छ। कार्यक्रममा बोल्दै प्रमुख अतिथी उपमेयर बानियाँले नेपालकै पहिलो सुइरो अभियानको सुरुवात गरेर राष्ट्रिय पुरस्कार पाएको क्लबलाई समाजमा देखिएको समस्या अन्त्यका गर्न र सामाजिक परिवर्तनमा लाग्न थप प्रेरणा मिलोस् भन्दै शुभकमान व्यक्त गरेका थिए।

क्लबको शिलान्यास गरिएको ३ कोठे सामुदायिक भवन हेटौंडा उपमहानगरको ५ लाख सहयोग र उपभोक्ताबाट ५८ हजार गरी कुल ५ लाख ५८ हजार लागतमा निर्माण हुने क्लबका अध्यक्ष राजकुमार बास्तोलाले बताएका छन् । २०४७ सालमा स्थापना भएको क्लब वातावरण संरक्षण राष्ट्रिय पुरस्कार २०५८ बाट समेत सम्मानित भएको थियो।