गरिबी निवारण सहकारीको नयाँ भवन बन्दै

१४ चैत, हेटौंडा । हेटौंडा-६ हात्तिलेटमा रहेको गरिबी निवारण बचत तथा ऋण सहकारी संस्थाको भवन शिलान्यास भएको छ । नेपाली कांग्रेसस बागमती प्रदेश सभापति एवम् बागमती प्रदेशसभा सदस्य ईन्द्रबहादुर बानियाँले गरेका हुन् । 
हेटौंडा उपमहानगरपालिका ६ नम्बर वडा कार्यालयमार्फत विनियोजन भएको ७ लाख रुपैयाँ बजेटबाट भवन बनाउन लागिएको संस्थाका अध्यक्ष कृष्णप्रसाद सापकोटाले जानकारी दिए । भवनको समुद्घाटन गर्दै नेता बानियाँले छरिएर रहेको पूँजीलाई एकिकृत गरी हुनेको बचत गर्ने र नहुनेलाई ऋण लगानी गर्ने काम सहकारीहरुले गरेको बताए । अर्थतन्त्रको खम्बाहरुमध्ये सहकारी संस्था पनि एक खम्बा भएकाले दिगो विकासको लक्ष्य प्राप्त गर्न सहकारी संस्थाहरुले महत्वपूर्ण भूमिका खेलेको बताए । सहकारी संस्थालाई आगामी दिनमा पनि सहयोग गर्दै भवन निर्माणको क्रममा सकेको सहयोग गर्ने प्रतिबद्धता समेत व्यक्त गरे । 
सहकारी संस्थाले ३ तले भवन बनाउन लागेको सहकारी संस्थाका उपाध्यक्ष रिपु प्रसाद गौतमले जानकारी दिए । 'संस्था स्थापना भएको २५ वर्षसम्ममा पनि आफ्नो भवन निर्माण गर्न सकेका थिएनौँ', उपाध्यक्ष गौतमले भने, ‘हेटौंडा ६ नम्बर वडा कार्यालयको विशेष पहलमानै यो अभियान सुरु भएको छ । हामीले सबैको साथ, सहयोग र सहकार्यको अपेक्षा राखेका छौँ ।' 
भवन शिलान्यास कार्यक्रममा हेटौंडा ६ का वडा अध्यक्ष विष्णुबहादुर दाहालले आगामी दिनमा पनि सहकारी संस्थालाई सहयोगको लागि वडा कार्यालय तयार रहेको बताए । कार्यक्रममा हेटौंडा ६ का वडा सदस्य विजय पौडेल , लेखराज ढकाल, सहकारीका निर्वतमान अध्यक्ष पुष्पराज पराजुली लगायत संस्थाका सञ्चालक समितिका पदाधिकारी र शेयर सदस्यहरुको उपस्थिति रहेको थियो ।