राजमार्ग हेटौँडा बजारबाट नजाने सरकारको निर्णय

१४ मंसिर, हेटौँडा । लामो समयदेखि विवादमा रहेको हेटौँडाको २५ मिटर सडक विस्तारको समस्या नेपाली कांग्रेस नेतृत्वको वर्तमान सरकारले समाधान गरेको छ । 
विहिबार बसेको मन्त्री परिषदको बैठकले हेटोँडाको रातोमाटेदेखि चौकीटोलसम्मको पूर्वपश्चिम राजमार्ग र त्रिभुवन राजपथ खण्डलाई राजमार्गबाट हटाउने निर्णय गरेको छ । रातोमाटेदेखि राप्तिपुलसम्मको बाईपासलाई राजमार्गका रुपमा निर्माण गर्ने निर्णय समेत मन्त्री परिषद बैठकले निर्णय गरेको छ । बर्षौदेखि हेटौँडाबासीको माग बाईपासबाट सडक विस्तार गर्नुपर्ने थियो । हेटौँडाको बजार क्षेत्रमा दुबैतर्फ १६/१६ मिटर बाटो विस्तार हुने मन्त्रीपरिषद बैठकले निर्णय गरेको उपप्रधानमन्त्री कमल थापाले जनाए । 
विहिबारको निर्णयले हेटौँडामा लामो समयदेखि विवादमा रहेको २५ मिटर सडक विस्तारको समस्या केही समाधान भएको छ । बजार क्षेत्रका घरधनी र व्यवसायीले बाईबासबाट राजमार्ग र भौतिक संरचना कम क्षति हुने गरी सडक विस्तारका लागि आग्रह गर्दै आएका थिए । 
नेपाली कांग्रेसका सभापति शेरबहादुर देउवा नेतृत्वको वर्तमान सरकारले घरधनी र व्यवसायी दुबैको समस्याको सम्बोधन र विकासको आकांक्षा दुबैलाई समेटेर निर्णय गरेको जनाईएको छ ।