अस्थाई संरचना हटाउँने क्रम २५ मिटर बिस्तारको तयारीः मेयर लामा

२१ बैशाख, हेटौंडा । हेटौंडा उपमहानगरपालिकाले बजार क्षेत्रमा व्यवसायीहरुले अस्थाई रुपमा घरसँगै जोडेर निर्माण गरेको टप हटाउने अभियान २५ मिटर बिस्तारको तयारीको रुपमा बुझ्न आग्रह गरेको छ ।
हरीत र शुन्दर नगरीको रुपमा रहेको हेटौंडा बजार क्षेत्रमा रहेको राजमार्गको बिस्तार नहँुदा बजारको स्वरुप थप बिग्रदै गएको भन्दै उपमहानगरपालिकाकी प्रमुख मिनाकुमारी लामाले अहिलेको अभियानलाई २५ मिटर बिस्तारको पहिलो चरणको तयारीको रुपमा बुझ्न आग्रह गरेकी हुन् ।
उनले उपमहानगरले अहिले बजारक्षेत्रको अस्थाई टप हटाउँने काम सडक बिस्तारको अभियानको पहिलो चरणको रुपमा सोच्न व्यवासायीहरुलाई सचेत गराएको उनको भनाई थियो । ‘अब २५ मिटर सडक बिस्तारको कामले गती लिन्छ भन्ने बुझ्न जरुरी छ ।’ उनले भनिन् ।
२५ मिटर क्षेत्रमा रहका व्यवसायीहरुलाई आफ्नो व्यवसाय सञ्चालनको लागी नयाँ ठाउँको व्यवस्थापन गर्न पनि उनले सुझाब दिइन् ।
गत सोमबारदेखि नै हेटौंडा उपमहानगरपालिकाले व्यवसायीहरुले आफ्नो पसल बाहिर थपेको ‘अस्थाई टप’ हटाउँन थालेको छ । उपमहानगरपालिकाले नगरप्रमुखको सहयोगमा हेटौंडा १, २, ४ र १० नम्बरमा रहेका पसल व्यवसायीले घरसँगै जोडेर बनाएको अस्थाई टप हटाइरहेको हो ।
उपमहानगरपालिकाले अहिलेसम्म त्रिभूवन राजपथको चौकिटोल ओरालो देखि पुर्वपश्चिम राजमार्गको राप्तिरोड हेटौंडा अस्पताल अगाडि सम्म क्षेत्रमा व्यवसायीले राखेको अस्थाई टप निकाल्ने काम नगर प्रहरीले गरीसकेको छ ।
हेटौंडा–१ तर्फ पर्ने त्रिभूवन राजपथ र पुर्वपश्चिम राजमार्गको हेटौंडा अस्पताल सम्मका व्यवसायीले राखेको करिब ७५ वटा अस्थाई टपहरु हटाएइसकेको उपमहानगरपालिकाले जनाएको छ ।