आन्दोलनमा डोजरमाथि चढ्ने मै हुँ : राउत

१९ मंसिर, हेटौँडा । मकवानपुर उद्योग बाणिज्य संघका महासचिब महेन्द्र राउतले आगामी कार्यकालका लागि आफुले अध्यक्षमा उम्मेदवारी दिने दावी पुनः दोहोर्याएका छन् ।

हेटौँडामा मंगलबार पत्रकार सम्मेलन गर्दै राउतले बजारमा आफ्नो उम्मेदवारीबारे अनावश्यक हल्लाहरु आएको भन्दै यसमा विश्वास नगर्न समेत व्यवसायीहरुलाई आग्रह गरेका छन् । उनले उम्मेदवारी नदिने, अरुलाई समर्थन गर्ने जस्ता चर्चा चल्न थालेपछि राउतले पत्रकार सम्मेलन नै गरी आफुले उम्मेदवारी दिने दावि गरेका हुन् । राउतले यसअघि नै पत्रकार सम्मेलन गरी उम्मेदवारी घोषणा गरेका थिए । आफु व्यवसायिक हितका लागि तल्लिन रहेको र मकवानपुरको आर्थिक जगतमा यसको प्रशंसा भईरहेको उनको भनाई छ । आफुले मकवानपुरका सबै क्षेत्रका उद्योगी व्यवसायीसंगको परामर्शमा उम्मेदवारी दिने घोषणा गरेको उनको भनाई थियो ।

२५ मिटर प्रकरणमा उद्योग बाणिज्य संघको नेतृत्व भाषणबाजीमा व्यस्त रहँदा व्यवसायीसंगै डोजरमा चढ्ने व्यक्ति आफु भएको समेत उनको दावि छ । हेटौँडा बजार उजाड हुनु भन्दा १६–१६ मिटर सडक कायम गर्ने सरकारी निर्णयले केही राहत मिल्ने उनको भनाई थियो । मकवानपुरको आर्थिक क्षेत्रको समस्या समाधानमा आफुले अहिलेसम्म सकारात्मक भुमिका खेलेको र आगामी दिनमा यसको निरन्तरताका लागि अध्यक्षमा उम्मेदवारी दिन लागेको बताए ।

पत्रकार सम्मेलनमा नेपाल निर्माण सामाग्री ब्यापार महासंघका बरिष्ठ उपाध्यक्ष कृष्णराम न्यौपानेले बाणिज्यतर्फको उपाध्यक्षमा उम्मेदवारी दिने बताए । उनले आफुले बाणिज्य क्षेत्रको समस्या नजिकबाट बुझेको बताउँदै उद्योग बाणिज्य संघमार्फत नीतिगत ढंगबाट समस्या समाधान गर्न प्रयास गर्ने दावि गरे । उनले आफुले यसअघि पनि संघको कार्यसमिति सदस्य भई व्यवसायिक हितमा काम गरेको भन्दै आगामी कार्यकालमा थप काम गर्ने अठोट व्यक्त गरे । उद्योग बाणिज्य संघलाई व्यवस्थित र संस्थागत व्यवसायिकता अभिबृद्धिमा प्रयास गर्ने दुबैको दावि छ ।