मकवानपुरका चिरपरिचित प्रतिष्पर्धी जो पराजित भए

२४ मंसिर, हेटौँडा । चुनाव भनेकै हार जित हो । तर एउटै उम्मेदवार उही प्रतिष्पर्धीसंग कति पटक हार्छ होला । मकवानपुरमा केही यस्ता चिरपरिचित प्रतिष्पर्धी छन् जो उही उम्मेदवारसंग पटक पटक हारिरहेका छन् ।
मकवानपुर क्षेत्र नम्बर १ का चिरपरिचित प्रतिष्पर्धी हुन् राप्रपा अध्यक्ष कमल थापा र एमालेका नेता कृष्णप्रसाद दाहाल । दाहाल र थापाले २६ बर्ष अघि संगै प्रतिष्पर्धा गरेका थिए । त्यसयता उनीहरुहरुको चुनावी जम्काभेट ४ पटक भईसक्यो । तर दाहालसंगको पराजित हुनलाई थापाले ह्याट्रिक गरिसके । त्यसैले होला यसपटक चुनावी अभियानका क्रममा थापाले ‘मैले कति पटक हारेको थाहा हुन छोडिसक्यो, जितेको एक पटक पन्चायतमा हो, त्यसपछि १ पटक बहुदल आएसी’ भन्ने गरेका थिए । दाहाल र थापाबीच २०४८, २०५१, २०५६ र २०७४ मा चुनावी प्रतिष्पर्धा भयो । २०५१ सालमा दाहाललाई पराजित गरेका थापा बाँकी निर्वाचनमा संग पराजित भए ।
थापा र दाहालजस्तै चुनावीमा मैदानमा पटक पटक जम्माभेटमा परेका उम्मेदवार हुन् एमाले केन्द्रीय सदस्य विरोध खतिवडा र कांग्रेस केन्द्रीय सदस्य महालक्ष्मी उपाध्याय डिना । यी दुबैको जम्का भेट पहिलो पटक २०४८ सालमा भएको थियो । त्यस यता दुबैबीच ३ पटक चुनावी प्रतिष्पर्धा भयो । खतिवडासंगको चुनावी हारमा उपाध्यायले ह्याट्रिक गरेकी छिन् । उनले चुनावी मैदानमा अहिलेसम्म जित हासिल गरेकी छैनन् । उपाध्यायलाई खतिवडाले २०४८, २०५१ र २०७४ मा पराजित गरे ।
मकवानपुरमा प्रतिष्पर्धा गरेकामध्ये विजयी हुने ईन्द्रबहादुर बानियाँ पूर्व गृहराज्यमन्त्री हुन् भने कृष्णप्रसाद दाहाल, विरोध खतिवडा, प्रेमबहादुर पुलामी र कुमारी मोक्तान पूर्व सांसदहरु हुन् । डोरमणी पौडेल हेटौँडाका पूर्व मेयर हुन् । पराजित मध्ये कमल थापा उपप्रधानमन्त्री, राजाराम स्यांतान पूर्व सांसद हुन् भने धर्मराज लामिछाने कांग्रेस क्षेत्र नम्बर १ का पूर्व सभापति हुन भने यतिराज सापकोटा कांग्रेस क्षेत्र नम्बर २ का सभापति हुन् ।