१३० किलो लागु औषध गाँजासहित ७ जना पक्राउ

५ वैशाख, हेटौंडा । नेपाली सेना र पर्सा राष्ट्रिय निकुञ्ज प्रशासनको सयुक्त गस्ती टोलिले पर्सा राष्ट्रिय निकुञ्जको बाटो भएर वीरगञ्जतर्फ लैजादै गरेको अवस्थामा लागुऔषध गाँजासहित मकवानपुरका ७ जनालाई पक्राउ गरेको छ । 
पक्राउ पर्नेहरुमा जिल्लाको कैलाश गाउँपालिका वडा नम्बर ४ का २८ वर्षीय बम बहादुर चेपाङ, सोही ठाउँका २७ वर्षीय विरमान प्रजा र २७ का हरि कुमार प्रजा रहेका छन् । यस्तै मनहरी गाउँपालिका वडा नम्बर ५ का ३६ वर्षीय दिपक थापा मगर, वडा नम्बर ३ का ४४ वर्षीय रामहरी लुईटेल र राक्सिराङ गाउँपालिका वडा नम्बर ७ का १९ वर्षीय टिकाराम प्रजा र एक जना नाबालक रहेका छन् । 
सेना र निकुञ्जको टोलीले उनीहरुलाई ४ गते दिउँसो २ः३० बजेको समयमा मकवानपुरको मनहरी गाउँपालिका वडा नम्बर–४ माथिल्लो मसिने हुँदै बोरामा गाँजा बोकेर पैदल पर्सातर्फ लैजाँदै गरेको अवस्थामा फेला पारेको प्रहरी प्रवक्ता भण्डारीले जानकारी दिए । 
निकुञ्ज र सेनाको टोलीले फेला पारेको लागुऔषध गाँजाका विषयमा प्रहरीलाई खबर गरेपछि जिल्ला प्रहरी कार्यालय मकवानपुरबाट प्रहरी वरिष्ठ नायव निरीक्षक प्रकाश सिम्खडा र इलाका प्रहरी कार्यालय नेवारपानीबाट प्रहरी नायव निरीक्षक रामशरण दुलालको कमान्डमा खटिएको प्रहरी टोलीले उनीहरुलाई नियन्त्रणमा लिएको थियो । पक्राउ परेकाहरुको बिषयमा थप अनुसन्धान भइरहेको प्रवक्ता भण्डारीले बताए ।