प्रदेश प्रमुख कोइराला आज हेटौँडा आउँदै ।

६ माघ, हेटौँडा । ३ नम्बर प्रदेश प्रमुख अनुराधा कोइराला आज शनिबार प्रदेशको अस्थायी मुकाम हेटौंडा आउने भएकी छिन् । पदभार ग्रहण एवम् ३ नम्बर प्रदेशको प्रदेशसभा सदस्यहलाई सपथ ग्रहण गराउन कोइराला हेटौंडा आउन लागेकी हुन् ।
प्रदेश प्रमुख कोइराला अपरान्ह ४ बजे हेटौँडा आइपुग्ने बताइएको छ । आजनै कोइरालाले पदभार ग्रहण गर्ने र आईतबार प्रदेशसभा सदस्यहरुलाई सपथ खुवाउने कार्यतालिका रहेको छ ।
अहिले क्षेत्रीय प्रशासन कार्यालय रहेको स्थानमा प्रदेश प्रमुखले पदभार ग्रहण गर्ने प्रदेश मन्त्री परिषद्को कार्यालयका प्रमुख सचिव तथा हालका क्षेत्रीय प्रशासक रेश्मीराज पाण्डेले जानकारी दिए । यस्तै जिल्ला समन्वय समितिको कार्यालयमा मुख्य मन्त्रीको कार्यालय रहने भएको छ ।
यस्तै अहिले क्षेत्रीय शिक्षा निर्देशनालय रहेको भवनमा प्रदेशसभा सदस्यहरुलाई सपथ ग्रहण गराउने कार्यक्रम रहेको पाण्डेले जानकारी दिए । उनका अनुसार प्रदेशको सभामुख र उपसभामुखको कार्यालय डिभिजन सडक कार्यालयको कम्प्लेक्समा बस्नेछ ।
३ नम्बर प्रदेशमा निर्वाचित तथा मनोनित गरी एकसय १० जना प्रदेशसभा सदस्य रहेका छन् । हेटौंडालाई ३ नम्बर प्रदेशको अस्थायी मुकाम तोकिएसंगै मुकामको लागि आवश्यक पूर्वाधारको तयारी अघि बढाइएको छ ।