बिजुलीमाया वनः श्रेष्ठ संगीत पुरस्कार कार्कीलाई 

  १० माघ, हेटौँडा । एकलाख राशीको बिजुलीमाया वनः श्रेष्ठ राष्ट्रिय संगीत पुरस्कारबाट भाषा, संगीत, साहित्य कला एंव सस्कृतिविद् चेतन कार्कीलाई सम्मान गर्ने भएको छ ।

भीम विराग संगीत साहित्य कला प्रतिष्ठान नेपालले प्रदान गर्दै आएको एकलाख राशीको बिजुलीमाया वनः श्रेष्ठ राष्ट्रिय संगीत पुरस्कार यस वर्ष कार्कीलाई प्रदान गर्ने जनाएको हो । बुधबार हेटौंडामा पत्रकार सम्मेलन गर्दै आगामी माघ १५ गते भाषा, संगीत, साहित्य कला एंव सस्कृतिविद् कार्कीलाई उक्त पुरस्कारबाट सम्मानित गर्ने प्रतिष्ठानका अध्यक्ष उज्वल शर्मा भण्डारीले बताउनुभयो ।

वरिष्ठ संगीत साधक, कवि एंव गीतकार भीम विराग जन्मजयन्तीको अवसरमा प्रतिष्ठानले विभिन्न क्षेत्रका व्यक्तित्वहरुलाई सम्मान गर्दै आइरहेको छ । यसैगरी प्रतिष्ठानले नगद १० हजार राशीको तुलसीमाया शिवकुमारी सृजनशील नारी पुरस्कार मकवानपुरकी साहित्यकार अनिता न्यौपानेलाई प्रदान गर्ने जनाएको छ । नगद ७ हजार ५ सय राशीको भीम मथुरा बाल प्रतिभा पुरस्कारबाट हेटौडाका चिराग डंगोल, १५ हजार नगद राशीको शीला नारी संगीत पुरस्कारबाट हेटौंडाकी गायिका विद्या तिवारी, २५ हजार नगद राशीको हर्षनर बज्राचार्य स्मृति पुरस्कारबाट नाट्यकर्मी कुमार शाहलाई सम्मानित गरिने प्रतिष्ठानले बताएको छ । यसैगरी २० हजार राशीको विजय बानियाँ स्मृति लोक संगीत पुरस्कार लोक गायिका कोमल वलीलाई प्रदान गरिने छ । यस्तै मकवानपुरे साहित्यकार निमेष निखिललाई ११ हजार १ सय ११ रुपैंया राशीको चिनु कुमारी लामा स्मृति साहित्य पुरस्कार र स्वास्थ्य क्षेत्रमा लामो समय स्वंयमसेवीको कार्य गरेकी चम्पा कोजुलाई प्रतिष्ठानले नगद १० हजार राशीको मङ्गलादेवी श्रेष्ठ स्मृति स्वास्थ्य पुरस्कार प्रदान गरिने प्रतिष्ठानले जनाएको छ । आगामी १५ गते हुने पुरस्कार समारोहमा गायक, संगीतकार तथा गीतकार जगत मर्दन थापा प्रमुख अतिथिको रुपमा हेटौंडा आउनुहुने प्रतिष्ठानका भण्डारीले बताउनुभयो ।