शान्तिटोलको सप्ताह महायज्ञमा २९ लाख रूपैयाँ संकलन

१६ फागुन, हेटौंडा । हेटौंडा-६ मा रहेको शान्तिटोल ट‍ोल विकास संस्थाको आयोजनामा फागुन ७ गतेदेखि फागुन १५ गतेसम्म भएको श्रीमद भागवत सप्ताह ज्ञान महायज्ञमा २९ लाख रूपैयाँभन्दा बढि रकम संकलन भएको छ । महायज्ञमा २९ लाख ९ हजार १४६ रूपैयाँ संकलन भएको हो ।
प्रमुख कथा वाचक पण्डित बद्री विशाल शास्त्री र उपवाचक निर्जल पौडेलबाट कथा प्रवचन भएको महायज्ञ समुद्घाटनको दिन २८ हजार ३५५ रूपैयाँ, कथा शुभारम्भको पहिलो दिन १ लाख १ हजार ७५८ रूपैयाँ, दोस्रो दिन १ लाख ३८ हजार १०५ रूपैयाँ र तेस्रो दिन शनिबार ४ लाख ४३ हजार ७३१ रूपैयाँ संकलन भएको छ ।
त्यस्तै, चौथो दिन आइतबार ३ लाख १४ हजार ७३२ रूपैयाँ, पाँचौ दिन सोमबार ५ लाख ३१ हजार ८२५ रूपैयाँ, छैठौं दिन मंगलबार ५ लाख १३ हजार ४०७ रूपैयाँ, सातौं दिन बुधबार ५ लाख २३ हजार १०५ रूपैयाँसहित २६ लाख ४१ हजार १३२ रूपैयाँ संकलन भएको कोषाध्यक्ष पूर्णभद्र चौलागाईंले बताए ।
त्यस्तै, महायज्ञको अन्तिम दिन बिहीबार १ लाख १७ लाख ७७९, दानपेटिकाबाट ३० हजार २३५, भुक्तानी लिन बाँकी ४६ हजार ११४ रूपैयाँ र कलशबाट १ लाख २० हजार रूपैयाँ दान रकम संकलन भएको छ ।
शान्तिटोलमा रहेको विपी गणेशमान स्मृति शान्ति पार्कमा राधाकृष्ण मन्दिर एवं ज्येष्ठ नागरिक भवन निर्माणका लागि फागुन ७ गतेदेखि १५ गतेसम्म सप्ताह ज्ञान महायज्ञ आयोजना गरिएको महायज्ञ मूल समारोहका संयोजक केशव धितालले जानकारी दिए ।
हेटौंडा-६ का कार्यवाहक वडा अध्यक्ष बिजय पौडेलको प्रमुख आतिथ्यतामा महायज्ञ समापन समारोहमा ज्येष्ठ नागरिकहरूलाई सम्मान गरिएको थियो ।
कार्यक्रममा हेटौंडा-६ वडा ज्येष्ठ नागरिक मञ्चका अध्यक्ष बासुदेव सापकोटा, कामधेनु बहुद्धेश्यीय सहकारीका अध्यक्ष उदय विडारी, सामुदायिक वन उपभोक्ता महासंघका केन्द्रीय सदस्य रामहरी चौलागाईं, महायज्ञका कोषाध्यक्ष पूर्णभद्र चौलागाईं लगायतले मन्तव्य गरेका थिए । 
कार्यक्रममा राजनीतिक दल, टोल विकास संस्था, सामाजिक संघसंस्था लगायतका प्रतिनिधिहरूको उपस्थिति रहेको थियो ।