हेटौंडा उपमहानगरपालिकाद्वारा पहिलो विद्यालय बस हस्तान्तरण

३० असार, हेटौंडा । हेटौंडा उपमहानगरपालिकाले नगरको एक सामुदायिक विद्यालयलाई पहिलो विद्यालय बस हस्तान्तरण गरेको छ ।
उपमहानगरपालिकाले पहिलो पटक हेटौंडा-६ बारूतेमा रहेको श्रीकृष्ण आधारभुत विद्यालयलाई विद्यालय बस हस्तान्तरण गरेको हो । हेटौंडा उपमहानगरपालिकाका कार्यवाहक प्रमुख राजेश बानियाँले बिद्यालयलाई बस हस्तान्तरण गरेका छन् । कार्यक्रममा बोल्दै प्रमुख अतिथि बानियाँले हेटौंडा उपमहानगरपालिकाले सामुदायिक विद्यालयको शैक्षिक सुधारका लागि पहिलो पटक श्रीकृष्ण आधारभुत विद्यालयलाई बस हस्तान्तरण गरेको बताए । उनले दोस्रो बस हेटौंडा-९ मा रहेको प्रगति माविलाई हस्तान्तरण गरिने बताए । उनले पूर्वाधारका साथै शैक्षिक गुणस्तर सुधारका लागि विद्यालय व्यवस्थापन समिति, शिक्षक, अभिभावक र विद्यार्थीको सामुहिक प्रयासमा जोड दिए । 
कार्यवाहक प्रमुख बानियाँ र पत्रकार रूपेश दुलाललाई सम्मान गरिएको कार्यक्रममा हेटौंडा-६ का वडा सदस्य लेखराज ढकाल, विद्यालयका प्रधानाध्यापक मन्दिरा घिमिरे, सहायक प्रधानाध्यापक दीपककुमार थापा, विद्यालय व्यवस्थापन समिति, सल्लाहकार, शिक्षक, विद्यार्थी, अभिभावक लगायतको उपस्थिति रहेको थियो । कार्यक्रम शिक्षक अभिभावक संघका अध्यक्ष शिवप्रसाद सञ्जेलको सभाध्यक्षतामा भएको थियो ।
उपमहानगरपालिकाले आव ०८१/८२ मा विद्यालय बसका लागि करिब २६ लाख ५० हजार रूपैयाँ बजेट उपलब्ध गराएको जनाइएको छ ।