सिन्धुलीको तीनपाटनमा नवनिर्मित अस्पतालको मुख्यमन्त्री बानियाँद्धारा उद्घाटन

२३ मंसिर, सिन्धुली । सिन्धुलीको तीनपाटन गाउँपालिकामा नवनिर्मित नगर अस्पतालको उद्घाटन गरिएको छ । बागमती प्रदेशका मुख्यमन्त्री इन्द्र बहादुर बानियाँले सोमबार एक कार्यक्रमका बिच नवनिर्मित नगर अस्पतालको उद्घाटन गरेका हुन् । 
नवनिर्मित नगर अस्पतालको उद्घाटन कार्यक्रममा बोल्दै मुख्यमन्त्री बानियाँले स्वास्थ्यमा नागरिकको सहज पहुँच प्रदेश सरकारको विशेष प्राथमिकता रहेको बताएका छन् । उनले शिक्षा, स्वास्थ्यजस्ता विषयलाई संविधानले नै नागरिकका मौलिक अधिकारको रूपमा ग्यारन्टी गरेको भन्दै प्रदेश सरकार मौलिक अधिकारलाई व्यवहारिक रूपमा कार्यान्वयन गर्न तत्पर रहेको जनाएका हुन् । मुख्यमन्त्री बानियाँले गणतन्त्र गरिबको व्यवस्था हो भन्दै उनले मुलुकमा लाभको अवस्थामा रहेको युवा शक्तिलाई प्रविधिमैत्री बनाउँदै रोजगारी सिर्जना गरिने बताएका छन् ।उनले विकासका पूर्वाधारसँगै नागरिकलाई अर्थोपार्जन गर्ने सीप विकास र लगानीसमेत दिनुपर्ने काममा प्रदेश सरकार लागि परेको बताएका छन्  ।कार्यक्रममा  प्रतिनिधिसभाका निर्वमान सदस्य श्याम घिमिरेले अवैधानिक र असंवैधानिक रूपमा संसद् भंग गरिएको भन्दै सरकार गठन समेत असंवैधानिक रूपमा गरिएको बताए । तीनपाटन गाउँपालिकाका अध्यक्ष कर्ण थापा मगरले सीमित स्रोतसाधनबीच पनि विकासका पूर्वाधार निर्माणलाई पालिकाले पहिलो प्राथमिकता दिएको बताए ।
करिब १२ करोड रूपैयाँको लगानीमा नगर अस्पताल भवन निर्माण सम्पन्न भएको हो । तीनपाटन गाउँपालिकाका अध्यक्ष कर्ण थापा मगरको सभाध्यक्षतामा सम्पन्न कार्यक्रममा संविधानसभा सदस्य मोहन बराल, नेपाली कांग्रेस सिन्धुलीका पूर्वसभापति उज्वल बराल लगायत सहभागी रहेको  थिए ।