नागरिकता किर्ते प्रकरणःबकैया ४ का वडाध्यक्ष दंगाल सहित ७ जना दोषी ठहर

७ पुस,हेटौँडा । मकवानपुरको बकैया गाउँपालिका वडा नम्बर ४ का वडाअध्यक्ष,वडा सचिव सहित ७  जना विरुद्ध किर्ते नागरिकता प्रमाणपत्र बनाएको तथा झुटो विवरण पेश गरी जग्गा नामसारी गरेको कसुरमा दुई वर्ष कैद र २० हजार रुपैयाँ जरिवानाको फैसला भएको अदालका सूचना अधिकारी केशवराज कौसिकले बताएका छन् । 

जिल्ला अदालत मकवानपुरले बकैया गाउँपालिका–४ का वडाध्यक्ष राजन दंगाल, वडा सचिव अनिशा श्रेष्ठ, सोमबहादुर न्यासुर, सानुमान थिङ र जमानसिंह भ्लोन  सहित सात जनालाई दुई वर्षदेखि आठ वर्षसम्म कैद सजाय सुनाएको हो  जिल्ला न्यायाधीश पूर्णिमा कोईरालाको एकल इजलासले आइतबार जनही दुई वर्ष कैद र २० हजार रुपैयाँ जरिवानाको फैसला गरेको हो। त्यसैगरी घटनामा संलग्न  पूर्णबहादुर भ्लोन र रामबहादुर न्यासुरलाई अदालतले आठ वर्ष कैद तथा एक लाख ३० हजार रुपैयाँ जरिवाना तोकेको छ।वडाध्यक्ष  दंगाल पुर्पक्षका लागि हाल भिमफेदी कारागारमा रहेका छन् । सरकारी कागजात किर्ते गरेको अभियोगमा उनलाई जिल्ला न्यायाधीश सकुन्तला कार्कीको इजलासले २०८१ कार्तिक २१ गते पुर्पक्षका लागि थुनामा पठाउन आदेश भएको थियो 

अदालतबाट दोषी ठहर भई कैद सजाय तोकिएका वडाध्यक्ष दंगाल सहित पूर्णबहादुर भ्लोन, रामबहादुर न्यासुर र जमानसिंह भ्लोन हाल पुर्पक्षका लागि भीमफेदी कारागारमा रहेका छन् ।