मकवानपुरमा २२ वटा हातहतियार प्रहरीमा बुझाइयो

फाईल तस्विर

११ फागुन, हेटौंडा । मकवानपुर जिल्लामा आसन्न निर्वाचनलाई शान्तिपूर्ण र भयमुक्त बनाउन इजाजत प्राप्त हातहतियार बुझाउने क्रम जारी रहेको छ । मकवानपुरमा ४७ वटा इजाजत प्राप्त हातहतियार रहेकोमा हालसम्म २२ वटा जिल्ला प्रहरी कार्यालयमा बुझाएका हुन् ।

जिल्ला प्रहरी कार्यालयका प्रहरी नायव उपरीक्षक पुष्कर बोगटीका अनुसार जिल्लाभित्र व्यक्तिगत इजाजतमा रहेका हातहतियारहरूमध्ये १६ वटा बैंकका सुरक्षा गार्डहरूले प्रयोग गर्दै आएका थिए । ती हातहतियार निर्वाचनको अन्तिम तयारीका क्रममा बुझाउने प्रक्रिया अगाडि बढिरहेको छ। केही हातहतियारधनीहरू बसाइँसराइ गरेर अन्य जिल्लामा गएका वा हाल विदेशमा रहेकाले बुझाइएको संख्या केही कम देखिएको उनले जानकारी दिए।

माघ ६ गते जिल्ला प्रशासन कार्यालयले जारी गरेको सूचनामा फागुन २१ गते हुने प्रतिनिधि सभा सदस्य निर्वाचनलाई स्वच्छ, निष्पक्ष र शान्तिपूर्ण ढंगले सम्पन्न गराउन जिल्लाभित्रका सबै इजाजत प्राप्त हातहतियार १५ दिनभित्र नजिकको प्रहरी इकाई वा जिल्ला प्रहरी कार्यालयमा बुझाउन अनुरोध गरिएको थियो।

बुझाइएका हातहतियार निर्वाचन सम्पन्न भएको एक महिनाभित्र सम्बन्धित धनीलाई सुरक्षितसाथ फिर्ता गरिनेछ। तोकिएको म्यादभित्र हातहतियार नबुझाउने वा अटेर गर्नेलाई प्रचलित कानुनबमोजिम कारबाही गरिने जनाइएको छ ।