नक्कली सुनसहित ४ जना पक्राउ

११ चैत, हेटौंडा । रौतहटको चन्द्रनिगाहपुरबाट प्रहरीले नक्कली सुनसहित ४ जनालाई पक्राउ गरेको छ ।

पक्राउ पर्नेहरूमा नुवाकोट तारकेश्वर गाउँपालिका-३ घर भई हाल भारतको पश्चिम बंगाल दार्जिलिङ बस्ने ३७ वर्षीय अशोक तामाङ, रौतहट चन्द्रपुर नगरपालिका-१० का ३० वर्षीय अरबिन्द चौधरी, बौधीमाई नगरपालिका-६ का ३८ वर्षीय रुपकेश राय यादव र भारत पश्चिम बंगाल सिलिगुडी जयगाउँका ३० वर्षीय संजोक बस्नेत छन् ।

चन्द्रनिगाहपुरस्थित जगत रिसोर्टमा शंकास्पद गतिविधि भइरहेको सूचनाको आधारमा पुगेको प्रहरी टोलीले चेकजाँच गर्दा अरबिन्द चौधरीले लगाएको हाफ पाइन्टको खल्तीमा रहेको पर्सभित्र ‘प्याम्प’ लेखिएको निलो प्लाष्टिकभित्र तीनवटा पोका फेला परेको थियो ।

त्यस्तै, ‘क्रेडिट सुइस १० ग्राम शुद्ध सुन ९९९ दशमलव ९’ लेखिएको प्याकसहित पहेँलो रंगको नक्कली सुनजस्तो धातु ४ थान, पोली कालो बनाइएको १ थान र टुक्रा पारिएको अवस्थामा २ थान गरी जम्मा ७ थान बरामद भएको जिल्ला प्रहरी कार्यालय रौतहटका प्रहरी प्रवक्ता एवं डिएसपी विष्णुप्रदीप बस्यालले जानकारी दिए ।

उनीहरूले सर्वसाधारणलाई झुक्याएर ठगी गर्ने उद्देश्यले नक्कली सुन राखेको प्रहरीले जनाएको छ ।