कानूनी दायरामा रहेर गरिने अनुसन्धानमा समर्थन छः बानियाँ

२१ बैशाख, हेटौंडा । बागमती प्रदेशका मुख्यमन्त्री इन्द्रबहादुर बानियाँले आफ्नो घरमा सम्पत्ति शुद्धीकरण अनुसन्धान विभागले गरेको छापामारीप्रति आपत्ति जनाएका छन् । तीन तहको सरकारमध्ये आफु प्रदेश सरकारको सरकार प्रमुख रहेको र राज्यको जुनसुकै निकायले अनुरोध गर्दा आफू भौतिक रूपमै पनि उपस्थित हुने अवस्था विद्यमान रहेको उल्लेख गर्दै उनले घर एवं आफु विगतमा संलग्न रहेको बानियाँ निर्माण सेवामा गरेको छापामारीप्रति आपत्ति जनाएका हुन् ।
बानियाँद्वारा प्रेस विज्ञप्ति जारी गर्दै राज्यको एक जिम्मेवार पदाधिकारीको हैसियतले संवैधानिक र कानूनी दायरामा रहेर गरिने हरेक अनुसन्धानमा आफ्नो पूर्ण समर्थन र सहयोग रहने जनाएका छन् । तीन तहको सरकार समन्वय, सहअस्तित्व र सहकार्यका आधारमा चलेको र सङ्घीय सरकारले गर्ने सकारात्मक कार्यमा प्रदेश सरकारको नेतृत्वकर्ताको रूपमा मुख्यमन्त्रीको सधैँ साथ रहने जनाए । राज्यको जुनसुकै तहले सुशासनको पक्षमा गर्ने हरेक कार्यमा सहयोग गर्न तत्पर रहेको स्पष्ट पार्न पार्दै उनले आफ्नो राजनैतिक र व्यावसायिक जीवनका बारेमा गर्ने छानबिनलाई सकारात्मक रूपमा लिएको जनाएका छन् । 
बागमती प्रदेशको मुख्यमन्त्री भएपछि आफ्नो प्रमुख प्राथमिकता नै सुशासन, पारदर्शिता र भ्रष्टाचारमुक्त समाजको निर्माण रहेको र सोही अनुसार बागमती प्रदेश सरकारको सार्वजनिक कार्य सञ्चालनमा खर्च कटौतीका साथै आर्थिक मितव्ययीताका लागि निरन्तर काम गर्दै जनाएका छन् । उनले आवश्यकता र औचित्यतामा आधारित योजना तथा कार्यक्रम र बजेटमा पारदर्शितालाई नीतिगत रूपमा अगाडि बढाइएको उल्लेख गरेका छन् ।
सम्पत्ति शुद्धीकरण अनुसन्धान विभागले गरेको छापामारीबाट व्यक्तिगत एवं सामाजिक चरित्रमाथि आघात पुगेको महसुस भएको उनको भनाई छ । उनले बागमती प्रदेश बासी एवम् आफ्ना शुभेच्छुक र शुभचिन्तकलाई भ्रमित र चिन्तित नहुन अनुरोध गर्दै बानियाँले आफु नागरिकको सेवामा सधैँ तत्पर रहने जनाएका छन् ।