अख्तियारद्वारा पूर्वअर्थमन्त्रीसहित १० जनाविरुद्ध आरोपपत्र दायर

२५ बैशाख, हेटौंडा । अख्तियार दुरुपयोग अनुसन्धान आयोगले पोखरा क्षेत्रीय अन्तर्राष्ट्रिय विमानस्थल निर्माणका क्रममा वैदेशिक ऋण परिचालनमा भ्रष्टाचार भएको दाबी गर्दै मुद्दा दायर गरेको छ।
अख्तियारले पूर्वअर्थमन्त्री ज्ञानेन्द्रबहादुर कार्की र बहालवाला तथा पूर्व उच्चपदस्थ कर्मचारीसहित १० जनाविरुद्ध विशेष अदालतमा आरोपपत्र दायर गरेको हो।
आयोगले कार्कीसहित पूर्वअर्थ सचिव शंकर प्रसाद अधिकारी, पूर्व पर्यटन सचिवद्वय महेश्वर न्यौपाने र सुरेश आचार्यलाई प्रतिवादी बनाएको छ। तत्कालीन सहसचिवहरू केवल प्रसाद भण्डारी, डण्डुराज घिमिरे, नागरिक उड्डयन प्राधिकरणका तत्कालीन महानिर्देशक संजीव गौतम, राष्ट्रिय गौरव आयोजनाका निर्देशक प्रदीप अधिकारी, इन्जिनियर योगेश अर्याल र कर्मचारीहरू युगराज पाण्डे तथा उर्मिला भण्डारीलाई पनि प्रतिवादी बनाइएको छ ।
आयोगले ठेकेदार कम्पनीका अध्यक्ष वाङ बो र परियोजना प्रबन्धक याङ झिगाङलाई समेत भ्रष्टाचारको मतियार ठहर गर्दै प्रतिवादी बनाएको छ। आयोगले पोखरा विमानस्थल निर्माणका क्रममा भ्रष्टाचार भएको भन्दै यसअघि पूर्वमन्त्रीसहित दजनौँलाई प्रतिवादी बनाउँदै दुईवटा मुद्दा दायर गरेको छ।
विमानस्थल निर्माणको जिम्मा पाएको चिनियाँ ठेकेदार कम्पनी चाइना सिएएमसी इन्जिनियरिङलाई कर छुट दिने गरी गैरकानुनी सम्झौता गरेर राज्यकोषलाई ३ अर्ब ६२ करोड ५ लाख २२ हजार नोक्सानी र्पुयाएको अख्तियारको दाबी छ ।
आयोगका प्रवक्ता सहायक प्रवक्ता गणेशबहादुर अधिकारीका अनुसार प्राधिकरण र ठेकेदार कम्पनीबीच भएको मूल खरिद सम्झौतामा निर्माण उपकरण र सामग्रीको कर तथा महसुल ठेकेदारले नै तिर्नुपर्ने स्पष्ट प्रावधान भए पनि तत्कालीन मन्त्री र सचिवहरूको बद्नियत राखेर सरकारी कोषबाट तिरिएको बताए।