हेटौंडा कपडा उद्योग पुनः सञ्चालनका लागि अध्ययन समिति

६ असोज, हेटौँडा । १६ बर्ष अघि बन्द भएको हेटौंडा कपडा उद्योग पुनः सञ्चालनका लागि अध्ययन गर्न उद्योग मन्त्रालयले समिति गठन गरेको छ ।

२०५७ सालदेखि बन्द रहेको उद्योग संचालनबारे अध्ययन गर्न राष्ट्रिय योजना आयोगका पूर्व सदस्य डा. पुष्कर बज्राचार्यको संयोजक र सदस्यमा अर्थमन्त्रालयका सहसचिव हरिशरण पुडासैनी, उद्योग मन्त्रालयका सहसचिव यमलाल भुसाल, नेपाली सेना, नेपाल प्रहरी र सशस्त्र प्रहरीका प्रतिनिधि, निजि क्षेत्रको तर्फबाट रामएकवाल यादव, विना गौतम र अजय मुडवरी रहेका छन् । समितिले १५ दिनभित्र अध्ययन गरी प्रस्ताव पेश गर्ने छ ।

बन्द अवस्थामा रहेको उद्योग संचालन गर्ने भन्दै यसअघि पनि एक पटक सरसफाई भएको थियो । २०६५ सालमा तत्कालिन अर्थमन्त्री डा. बाबुराम भट्टराईको पालामा उद्योग सञ्चालन गर्न भन्दै मर्मतसम्भारका नाममा ८ करोड २९ लाख रुपैँया खर्च गरिएको थियो । त्यसपछि, आर्थिक बर्ष २०६८/०६९ मा उद्योग संचालनका लागि अध्ययन गर्न भन्दै उद्योग मन्त्रालयका सहसचिव यमकुमारी खतिवडाको संयोजकत्वमा गठित सात सदस्यीय अध्ययन टोली गठन गरिएको थियो ।

२०६९ साल माघ १२ गते बसेको मन्त्रिपरिषद्को बैठकले हेटौँडा कपडा उद्योग लिमिटेड खारेज गरी औद्योगिक क्षेत्र व्यवस्थापन लिमिटेडलाई सम्पत्ति सुम्पिएको थियो । औद्योगिक क्षेत्र व्यवस्थापन कार्यालयले पनि उद्योगको जग्गामा नयाँ उद्योगहरु राख्नका लागि तयारी गरिरहेको छ ।