नारायणी संघद्वारा व्यवसायीहरुसंग अन्तरक्रिया

२९ बैशाख, हेटौँडा । नारायणी यातायात व्यवसायी संघले पछिल्लो समय यातयात क्षेत्रमा देखिएको असहज परिस्थितिको बारेमा व्यवसायीहरुसंग छलफल गरेको छ ।  अहिलेको अवस्थाबारे यथार्थ जानकारी दिन संघले शनिबार आफ्ना यातयात व्यवसायी सदस्यसंग अन्तरक्रिया गरेको हो ।

कार्यक्रममा संघका अध्यक्ष हिरालाल श्रेष्ठले अहिलेको अवस्थाबाट नआत्तिन सदस्यहरुलाई आग्रह गरे । उनले राज्य पक्षबाट परिमार्जित निर्देशिका अनुसार अब प्रत्येक सवारी धनीले कंम्पनी दर्ता गरेर मात्र सवारी चलाउनु पर्ने बाध्यता आईपरेको बताउँदै यसबाट ९५ प्रतिशत यातयात ब्यबसायी मारमा परेको समेत बताए । संघको खाता रोकिएको भएपनि व्यवसायीले पाउँदै आएको सुविधाबाट बन्चित हुन नपर्नेमा विश्वस्त पार्दै उनले आफुहरुले आर्थिक हिनामिन गरेको भए छानविन गर्न सरकारलाई चुनौति दिए ।

संघका महासचिब सरोज खनालले संघमा सबै यातायात व्यवसायी सदस्यको योगदान रहेको भन्दै विगतमा पाईरहेको सेवा सुविधा पाउनेमा ढुक्क हुन आग्रह गरे । केही समयभित्र ठोस निष्कर्ष निस्कने भन्दै त्यतिञ्जेल धैर्य गर्न आग्रह गरे । कार्यक्रममा निवर्तमान अध्यक्ष एवं ३ नम्बर प्रदेश संयुक्त आन्दोलन परिचालन समितिका सहसंयोजक बद्री प्रसाद चौलागाईले सरकार र यातयात ब्यबसायीबिच वार्ता भई कार्यदल बनिसकेको बताउँदै एक महिना भित्र कार्यदलले निष्कर्ष निकाल्ने बताए । उनले राज्यले यातायात व्यवसायीलाई मार पर्ने निर्णय नगर्नेमा आशावादी रहेको बताए ।