तरुण दल जिल्ला उपाध्यक्षबाट २ कठ्ठा जग्गा दान

१६ भदौ, हेटौँडा । नेपाल तरुण दल मकवानपुरका उपाध्यक्ष रामकुमार रायमाझी ‘हारा’ ले मनहरी गाउँपालिका–१ नम्बर वडा कार्यालयलाई भवन निर्माणको लागि करिब २ कट्ठा जमिन प्रदान गर्ने घोषणा गरेका छन् । 

शनिबार मकरीमा भएको एक कार्यक्रममा उनले आफ्ना स्वर्गीय दाजु राजकुमार रायमाझीको नाममा दुई कट्ठा जग्गा दिने घोषणा गरेका हुन् । विवादको कारण मनहरी गाउँपालिका–१ को भवन निर्माणमा अन्यौलताको अवस्था रहेको थियो । १ नम्बर वडाको भवन निर्माणको लागि जग्गा छनौटको क्रम चलिरहेको थियो । जग्गा छनौट समितिले रामकुमार रायमाझीले दिने जग्गा भवन निर्माणको लागि उपयुक्त भएको निष्कर्ष समेत निकालेको छ । ‘जग्गाको अभावमा भवन निर्माणको बिषय टुंगिन नसकेको जानकारी पाएपछि भेलामा उपस्थित भएर मैले स्वर्गीय दाईको नाममा जग्गा दिने घोषणा गरेको हुँ ।’ आगामी दिनमा पनि आवश्यकता अनुसार आफ्नो वडा र गाउँपालिकाको लागि सक्ने सहयोग गर्ने रायमाझीले प्रतिबद्धता जनाए ।

‘जग्गाको अभावमा भवन निर्माणको बिषय टुंगिन नसकेको जानकारी पाएपछि भेलामा उपस्थित भएर मैले स्वर्गीय दाईको नाममा जग्गा दिने घोषणा गरेको हुँ ।’

१ नम्बर वडा अध्यक्ष शिवप्रसाद खनालले युवाहरुमा सामाजिक भावना देखिनु सकारात्मक भएको उल्लेख गर्दै वडालाई जग्गा प्राप्त भएकोमा खुसी व्यक्त गरे । आधिकारिक रुपमा जग्गा प्राप्ति भएसंगै भवन निर्माणको प्रक्रियामा जानेछौं ।’ यस्तै नेपाल कम्युनिष्ट पार्टीका नेता भूमीनन्द अर्यालले वडालाई प्रदान भएको जग्गामा भवन निर्माणको लागि मनहरी गाउँपालिका तथा स्थानीयबासीको सहयोग आवश्यक रहेको बताए । कार्यक्रममा भवनको लागि जग्गा छानवीन समितिका संयोजक रघुनाथ अधिकारी, सदस्य भीमसेन अधिकारीलगायतको आतिथ्यता थियो । ६ मिटरको बाटोसहितको २ कट्ठा जग्गा रायमाझीले वडालाई उपलब्ध गराउने भएका छन् ।