हेटौंडामै आवासीय सुविधासहित इन्जिनियरिङ कक्षा

१९ भदौ, हेटौँडा । हेटौँडा–६ चौघडामा रहेको बंशगोपाल माविले जिल्लामै पहिलो पटक आवासीय सुविधासहित सिभिल इन्जिनियरिङको कक्षा संचालन गर्ने भएको छ । यसै शैक्षित्र सत्रदेखि सिभिल इन्जिनियरिङको कक्षा संचालन गर्नका लागि भर्ना खुलेको हो । 
‘विद्यालयमा भर्ना हुने क्रम जारी छ’–प्राचार्य रमेशप्रसाद लामिछानेले भने–‘विद्यालयमा छात्रावासको समेत व्यवस्था गरेका छौं ।’ उनले छात्रावासमा २० जनाले आवासीय सुविधा प्राप्त गर्ने जानकारी दिए । टाढाबाट आई बंशगोपालमा अध्ययन गर्न चाहनेका लागि सुविधा होस् भन्ने उद्देश्यले छात्रावासको व्यवस्था गरिएको उनको भनाई छ । विद्यालयमा अहिले सिटिईभिटिको प्रवेश परीक्षा उर्तिण विद्यार्थीले भर्ना गरिरहेका छन् भने नयाँ विद्यार्थीले प्रवेश परीक्षाका लागि फारम भर्ने काम भईरहेको छ । 
विद्यालयले भदौंको अन्तिम साताबाट सिभिल इन्जिनियरिङ ३ बर्षे डिप्लोमा कक्षा संचालन गर्ने संकाय प्रमुख रविन पाठकले बताए । एसर्ईई उर्तिण विद्यार्थीले अध्ययन गर्न पाउने सिभिल इन्जिनियरिङ कक्षाका लागि बंशगोपालमा ४८ सिटमा भर्नाको अनुमति दिएको छ । सिभिल इन्जिनियरिङ अध्ययनका लागि एसईई परीक्षामा कम्तिमा विज्ञान र गणितमा सी र अंग्रेजीमा डि प्लस ग्रेड ल्याएको हुनुपर्ने संकाय प्रमुख पाठकले बताए । 
सेमेष्टर प्रणालीमा अध्यापन हुने कोर्षमा ६ सेमेष्टरका लागि २ लाख ५० हजार रुपैँया शुल्क निर्णारण गरेको विद्यालयले जनाएको छ । प्राविधिक क्षेत्रमा दक्ष जनशक्ति तयार गर्ने उद्धेश्यले सामुदायिक विद्यालयले यो कक्षा संचालन गरेको विद्यालय व्यवस्थापन समितिका अध्यक्ष श्यामप्रसाद श्रेष्ठले बताए ।