अग्निहोत्राश्रम बार्षिकोत्सवको तयारी पुरा, उद्घाटन प्रचण्डले गर्ने

१९ भदौ, हेटौँडा । मकवानपुरको मनहरी–९ रजैयामा रहेको ओम श्री वातावरण शुद्धिकरण अभियान अग्निहोत्राश्रमको बार्षिकोत्सवको तयारी पुरा भएको छ । आश्रम समितिले आज रजैयामा पत्रकार सम्मेलन गरी बुधबार हुने बार्षिकोत्सवको तयारी पुरा भएको जनाएको हो ।

बार्षिकोत्सवको उद्घाटन नेपाल कम्युनिष्ट पार्टी (नेकपा) का अध्यक्ष पुष्पकमल दाहाल प्रचण्डले गर्ने भएका छन् । कार्यक्रममा प्रदेश नम्बर ३ का मूख्यमन्त्री डोरमणी पौडेल, मन्त्रीहरु, राष्ट्रिय, प्रतिनिधि र प्रदेशसभा सदस्यहरुको सहभागिता रहने आश्रमका संरक्षक सिताराम खनालले जानकारी दिए । पत्रकार सम्मेलनमा बोल्दै मनहरी गाउँपालिका अध्यक्ष एकराज उप्रेतिले आश्रममा आयुर्वेदिक अस्पताल संचालन गर्ने योजना रहेको बताए । यो क्षेत्रलाई पर्यापर्यटकीय क्षेत्रको रुपमा विकास गर्ने उनको भनाई थियो ।

पत्रकार सम्मेलनमा पूर्व सभासद् राजाराम स्यांतान, युवा व्यवसायी अरुणराज सुमार्गी, आश्रमका सचिव विनोदकुमार अर्याल लगायतको सहभागिता रहेको थियो । ५ विगाह २ कठ्ठा क्षेत्रफलमा फैलिएको आश्रममा बुधबार जडिबुटि उद्यान, चाणक्य हल उद्घाटनसहित बार्षिकोत्सव मनाईने भएको छ । आश्रममा वेद, वेदाङ्ग, आयुर्वेद, ज्योतिष, राजनीति शास्त्र, कर्मकाण्डसहितका विषयमा अनौपचारिक अध्यापन हुने गरेको छ ।