मिश्रको संसदीय सुनुवाइ भदौ २५ गते

२२ भदौ, काठमाडौं । सर्वोच्चका कामु प्रधानन्यायाधीश ओमप्रकाश मिश्रको संसदीय सुनुवाइ भदौ २५ गते हुने भएको छ । संवैधानिक परिषदले प्रधानन्यायाधीशका लागि प्रस्ताव गरेका उनको सुनुवाई भदौ २५ गते हुने भएको हो ।

प्रतिनिधिसभाको सार्वजनिक सुनुवाई समितिका जेष्ठ सदस्य लक्ष्मणलाल कर्णको अध्यक्षतामा शुक्रबार बसेको बैठकले मिश्रविरुद्ध परेका उजुरीहरु खोलेर हेरेपछि भदौ २४ गते उजुरीकर्तासँग छलफल गर्ने र २५ गते सुनुवाई गर्ने मिति तय गरेको छ । कामु प्रधानन्यायाधीश मिश्र विरुद्ध ५ आरोप लगाउँदै चारवटा उजुरी हालेका छन् ।

उनलाई त्रिभुवन विश्वविद्यालयको गणित विषयको उपप्राध्यापक नियुक्तिको क्रममा लिएको परीक्षाको प्रश्नपत्र आउट गर्ने नन्दकिशोर पुनलाई छुट दिएको, पत्नी हत्याको आरोपमा सजाय काटिरहेका सशस्त्र प्रहरीका पूर्व डिआईजी रञ्जन कोइरालाको मुद्दामा घुस लिएर झगडीया झिकाउने आदेश दिएको र आफ्नो नातेदारलाई जिताएको, कालिकोटमा अभियुक्तलाई सफाई दिएको आरोप लगाईएको छ ।

त्यस्तै, एनसेल र सूर्य नेपालको राजश्व तथा कर छलीको मुद्दामा सहयोग गरेको तथा काठमाडौं जिल्ला अदालतको न्यायाधीश रहँदा वैदेशिक न्यायाधिकरणले पीडितलाई १० लाख ५ हजार क्षतिपूर्ति दिने निर्णयलाई उल्टाएर क्षतिपूर्तिको रकम घटाएर ४ लाख ९० हजार कायम गरी बिचको रकम घुस लिएको आरोप छन् ।