मनकामनाले किसानलाई बाँडयो ५ करोड ५० लाख

१५ मंसिर, हेटौँडा । मकवानपुरगढी–३ मक्रान्चुलीमा रहेको मनकामना दुग्ध उत्पादक सहकारी संस्थाले आव ०७४/०७५ मा शेयर सदस्यहरुबाट दुग्ध खरीद गरेवापत ५ करोड ५० लाख भुक्तानी दिएको छ । 
यो रकम संस्थाले ९ लाख ९१ हजार ८ सय ९५ लिटर दूध खरीद गरेवापत किसानहरुलाई भुक्तानी दिएको हो । संस्थाको शनिवार सम्पन्न भएको ३१ औं वार्षिक साधारणसभामा प्रस्तुत भएको संस्थागत प्रतिवेदनमा सो कुरा उल्लेख गरिएको छ । साधारणसभाको उदघाटन गर्दै प्रदेश ३ का भूमिसुधार, कृषि तथा सहकारी मन्त्री दावा दोर्जे लामाले प्रदेश सरकारले सहकारीको विकासको लागि आवश्यक सहयोग गर्ने बताए । सहकारीको माध्यमबाट समृद्धिको ढोका खोल्न सकिने बताउदै मन्त्री लामाले सबैको सहयोग र साथ लिएर सहकारीको विकास गरिने बताए ।
कार्यक्रममा सहकारीका अध्यक्ष कृष्णप्रसाद दाहालले संस्थागत प्रतिवेदन र लेखा समितिका संयोजक मधुसुदन देवकोटाले आर्थिक प्रतिवेदन प्रस्तुत गरेका थिए । भेलामा मकवानपुरगढी गाउँपालिकाका अध्यक्ष विदुर हुमागाई,केन्द्रीय दुग्ध उत्पादक सहकारी संघका अध्यक्ष नारायणप्रसाद देवकोटा, सहकारी संघका केन्द्रीय सदस्य बद्रीप्रसाद लम्साल,मकवानपुर जिल्ला दुग्ध उत्पादक सहकारी संघका अध्यक्ष बासुदेव अधिकारी,संस्थाका संस्थापक अध्यक्ष हरप्रिसाद अधिकारी, पूर्व अध्यक्ष कृष्णप्रसाद पोखरेल,व्यवस्थापक बलराम हुमागाई लगायतकाले मन्तव्य व्यक्त गरेका थिए ।