हेटौँडाको 'नो पार्किङ' हटेकै हो त मेयर साव ?

सुनिल शिवाकोटी

२० मंसिर, हेटौँडा । हेटौँडाको मूख्य बजार क्षेत्रमा कायम गरिएको नो पार्किङ होर्डिङ बोर्डमा मात्र सिमित भएको देखिएको छ । हेटौंडा उपमहानगरपालिकाले भदौको पहिलो सातादेखि हेटौंडाको मुख्य बजार क्षेत्रलाई नो पार्किङ कायम गरेकोमा अहिले अधिकांश क्षेत्रमा सवारी साधन पार्किङ भईरहेको छ ।

नो पार्किङ जोन अहिले पार्किङ जोनमा परिणत भएको सर्वसाधारणको भनाई छ । हेटौँडा–४ को सिमाचोक देखि पारिजातपथ जोडने मोड, कान्तिलोकपथमा जताजतै सवारी पार्किङ गरेको पाईन्छ । ‘व्यवस्थापनको काम नगर प्रहरी हो तर  नगरको व्यवस्थापनका लागि खटिने गरेको नगर प्रहरी मुखर्दशक रहेको  बरु  कहिलेकाँही ट्राफिकले यसो कडाई गर्छन , नत्र सडकमै पार्किङ गर्दा पनि आँखा चिम्लिएका छन् नगर प्रहरी आउदैनन’–कान्तिलोकपथका एक व्यवसायीले भने । यी क्षेत्रमा बिहानै देखि मोटरसाइकल र हलुका सवारी र मालबाहक ट्रक यत्रतत्र पार्किङ गरेको राखिएको अवस्थामा पाईन्छ । उपमाहानगरपालिकाको यस अभियानलाई त्यस क्षेत्रमा व्यवसाय गर्ने व्यवसायी र सवारी चालकहरुले ठाडै उलल्गन गरेको पाईन्छ । त्यस क्षेत्रमा रहेको सडकदेखि सडक पेटीसम्म मोटर साइकल पार्किङ गर्दा आवतजावतमा समस्या परेको किनमेलका लागि बजार आएका श्रवण थापाले बताए ।

प्रदेश नम्बर ३ को राजधानी हेटौँडा बजारको ट्राफिक अस्तव्यस्त हुँदा पनि यसलाई व्यवस्थित गर्न सम्बन्धित निकायले वेवास्ता गरेको थापाको भनाई छ । केही समय अघिसम्म ट्रफिक प्रहरीले नो पार्किङ क्षेत्रमा पार्किङ गरिएका सवारी साधनलाई कारवाही गर्ने गरेको भएता दशै, तिहारपछि वेवास्ता भएको छ । उपमहानगरपालिकाले ठूलै कसरतका साथ शुरु गरेको नो पार्किङ अभियानबाट उपमहानगर आफैं पछि हटेको त हैन भन्ने आशंका सर्वसाधारण गरेका छन् । ‘नो पार्किङ हटेकै हो त मेयर साव ?’ भन्दै उनीहरुले प्रश्न गरेका छन् ।