प्राधिकरणले भाडा बृद्धि गरेको प्रति आईएसपिएएनको विरोध

६ पुस, हेटौँडा । नेपाल विद्युत प्राधिकरणले पोलको भाडा बृद्धि गरेको प्रति इन्टरनेट सेवा प्रदायकहरुको छाता संगठन आईएसपिएएनले विरोध गरेको छ ।
आईएसपिएएनका अध्यक्ष भोजराज भट्टद्वारा हस्तक्षरित ध्यानाकर्षण पत्रमा प्राधिकरणले आफ्नो पोल इन्टरनेट सेवा प्रदायकले प्रयोग गरेबापत भाडा बृद्धि गर्दा इन्टरनेट सेवाको मूल्यमा असर पर्ने भन्दै न्यायोचित भाडा दर कायम गर्न माग गरिएको छ । ध्यानाकर्षण पत्रमा उक्त भाडा दर बृद्धि हुँदा इन्टरनेटको मूल्य बृद्धि हुने र यसको मार इन्टरनेट सेवा प्रयोगकर्तामा पर्ने भएकाले यसतर्फ ध्यान दिन सम्बन्धित निकायलाई आग्रह गरिएको छ ।

अहिले प्राधिकरणबाट ५ गुणाभन्दा बढिले भाडा बृद्धि भएकोले यो अस्वभाविक रहेको बताईएको छ । भाडा दर कायम गर्न नेपाल विद्युत प्राधिकरण, नेपाल दुरसंचार प्राधिकरण, आईएसपिएएन र केबल टिभि एशोसियसन समेतको समिति गठन गरी भाडा बृद्धिको उचित निकास दिन माग गरिएको छ ।

यसैगरी, आईएसपिएएनले सूचना तथा संचार प्रविधि मन्त्रीसंग इन्टरनेटको मूल्य समायोजन गर्ने बारे भएको सम्झौता कार्यान्वयनका लागि समेत माग गरेको छ । सम्झौता भएको ५ महिना भईसक्दा समेत कार्यान्वयनका लागि सम्बन्धित निकायले तत्परता नदेखाएको आईएसपिएएनको गुनासो छ । पटक पटक अनुरोध गर्दा समेत कुनै निकास नआएकाले इन्टरनेट सेवा प्रदायकहरुले पुस १५ गतेबाट १३ प्रतिशत अतिरिक्त दुरसंचार सेवा शुल्क लिने निर्णय गरेको समेत सूचना तथा संचार प्रविधि मन्त्रीलाई पठाएको पत्रमा उल्लेख गरिएको छ ।