अफिसर्स क्लब राक्सिराङ्गमा,चेपाङलाई न्यानो कपडा सहयोग

चेपाङलाई न्यानो कपडा सहयोग गर्दै मकवानपुरका प्रजिअ तामाङ्

२३ पुस,हेटौँडा। जिल्लाको विकट राक्सिराङ्ग गाउँपालिकाको दामराङमा रहेका २ सय २ चेपाङ समुदायलाई न्यानो कपडा वितरण गरिएको छ । अफिसर्स क्लब मकवानपुरको अगुवाईमा आइतबार एक कार्यक्रमको आयोजना गरी ब्ल्याङ्केट वितरण गरिएको हो ।

 अफिसर्स क्लब मकवानपुरका अध्यक्ष नेपाल भुषण वैद्यको अध्यक्षतामा भएको कार्यक्रममा प्रदेशसभाका सदस्य सन्तबहादुर प्रजा, मकवानपुरका प्रमुख जिल्ला अधिकारी आस्मान तामाङ, सशस्त्र प्रहरी गण हेटौँडाका प्रहरी नावय उपरीक्षक अमर खत्री, नेपाल पत्रकार महासंघ मकवानपुरका पूर्व अध्यक्ष राममणि दाहाल, नेपाल चेपाङ संघका अध्यक्ष खेम चेपाङ, राक्सिराङ गाउँपालिका वडा नम्बर ७ का अध्यक्ष कुलबहादुर चेपाङले संयुक्त  रुपमा ब्ल्याङ्केट वितरण गरेका थिए ।  
कार्यक्रममा बोल्दै प्रदेश नम्बर ३ प्रदेशसभा सदस्य सन्तबहादुर प्रजाले चेपाङ समुदायका बारेमा रहेको भ्रम चिर्नु आवश्यक भएको भन्दै चेपाङ समुदाय अझै पछाडि परेकोले राज्यले विशेष कार्यक्रम दिएर उनीहरुको समस्याको संवोधन गर्नुपर्ने बताए । 
मकवानपुरका प्रमुख जिल्ला अधिकारी आस्मान तामाङले सिमान्तकृत समुदायलाई जाडोमा  न्यानो कपडा वितरण गर्न पाउँदा आफु हर्षत भएको बताए ।त्यसैगरी अफिसर्स क्लब मकवानपुरका अध्यक्ष बैद्यले अफिसर्स क्लब, उद्योग संघ मकवानपुर, युनिक कन्ष्ट्रक्शन कम्पनीलगायतको सहयोगमा २०२ परिवारलाई दुईलाख दुईहजार मूल्यको ब्ल्याङ्केट वितरण गरिएको जानकारी दिए  ।
जाडोमा न्यानो कपडा पाएपछि घण्टौ पैदल हिडेर न्यानो कपडा लिन आएका विपन्न चेपाङ तथा तामाङहरुले खुशी ब्यक्त गरेका थिए ।