खाद्य मेलाको तयारी अन्तिम चरणमा

८माघ, हेटौँडा ।  परम्परागत, पोषिला एंव स्थानिय खाद्य पदार्थको प्रवद्र्धन गरौं, असल पोषणका लागि खानेबानीमा सुधार गरौं भन्ने नाराका साथ  यही माघ ११ गते देखि १३ गते सम्म  हेटौंडा १८ हर्नामाडीमा हुन गईरहेको खाद्य मेलाको तयारी अन्तिम चरणमा पुगेको जनाईएको छ  । 
मंगलबार  खाद्य प्रविधि तथा गुण नियन्त्रण कार्यालय हेटौंडाले पत्रकार सम्मेलन आयोजना गर्दै तयारी अन्तिम चरणमा पुगेकोे जनाएको हो । 
खाद्य प्रविधि तथा गुण नियन्त्रण कार्यालय हेटौंडाको आयोजनामा हेटौंडा १८ हर्नामाडीमा रहेको ज्योती माध्यामिक विद्यालयको प्राङ्गणमा हुने मेलामा परम्परागत खाद्य पदार्थहरु एंव तिनका पौष्टिक महत्व बारे जानकारी, होटल, खाद्य व्यवसायी, खाद्य उद्यमका मेशिनरी उपकरण तथा खाद्यप्रशोधनमा प्रयोग हुने रसायनका सप्लायर्सहरु, खाद्य प्रविधिसंग सम्बन्धित शैक्षिक संस्थाहरुको स्टल रहने कार्यालयका प्रमुख सोमकान्त रिजालले जनाएका छन ।  
 मेलामा ५० देखि ६० वटा सम्म स्टल रहने र मेला विहान १० बजे देखि ६ बजे सम्म संचालन रहने जनाइएको छ । 
 हेटौंडा उपमहानगरपालिका र होटल एशोसियसन सह आयोजक रुपमा रहेको मेलामा  निशुल्क प्रवेश सहित निशुल्क स्टलको व्यवस्था  रहने बताइएको छ । कार्यक्रमको ११ गते १ बजे कृषि तथा पशुपन्छी विकास मन्त्रालयका राज्यमन्त्री रामकुमारी चौधरीले उद्घाटन गर्ने पत्रकार सम्मेलनमा जनाईएको छ । मेलामा करिब १५ लाख बराबर खर्च हुने अनुमान गरिएको कार्यालयका प्रमुख सोमकान्त रिजालले जनाएका छन ।