राजदेवी दुग्ध सहकारीको २४ औं वार्षिकोत्सव

२२ माघ, हेटौंडा । हेटौडा–१७, राजदेवीमा रहेको राजदेवी दुग्ध उत्पादक सहकारी संस्था लिमिटेडको २४ औं वार्षिकोत्सव सम्पन्न भएको छ । 
वार्षिकोत्सवको अवसरमा संस्थाले गीत तथा नृत्य प्रतियोगिताको आयोजना गरेको थियो । प्रतियोगिहरुले संस्थाले गरेका विभिन्न कार्यहरुको बारेमा गीतको माध्यमबाट प्रशंसा गर्नुको साथै भविष्यमा गर्नु पर्ने कामहरुको बारेमा समेत जानकारी गराएका थिए । 
प्रतियोगितामा हिरा घिमिरेको समूह प्रथम, जानुका दाहालको समूह द्वितीय, सावित्री अधिकारीको समूह तृतीय भएका थिए भने दुर्गा चौलागाईको समूहले सान्त्वना पुरस्कार प्राप्त गरेका थिए । प्रतियोगितामा स्थानीय बाल कलाकारहरुले आफनो प्रस्तुती प्रस्तुत गरेका थिए । 
हेटौडा–१७ का वडा सदस्य भीमप्रसाद अधिकारीको प्रमुख आतिथ्यता एवम सहकारीका अध्यक्ष रामप्रसाद तिमल्सिनाको अध्यक्षतामा कार्यक्रम भएको थियो । कार्यक्रममा राजदेवी टोल विकास संस्थाका अध्यक्ष चिरन्जिवी थापा, संस्थाका पूर्व व्यवस्थापक दिव्यराज धमला, समाजसेवी कृष्ण प्रसाद नेपाल, व्यवस्थापक घनश्याम दाहाल, संचारकर्मी भीमसेन पौडेल, संस्थाका उपाध्यक्ष प्रतिमा चौलागाई लगायतकाले मन्तव्य व्यक्त गरेका थिए । 
प्रतियोगिताको निर्णायकमा प्रमोदकुमार दाहाल, पार्वती ढुङ्गाना र रमेशकुमार पराजुली रहेका थिए ।