कांग्रेस नेता बानियाँद्वारा अर्को एम्बुलेन्स हस्तान्तरण

७ फागुन, हेटौँडा । नेपाली कांग्रेस ३ नम्बर प्रदेश संसदीय दलका नेता एवं कांग्रेस मकवानपुरका सभापति ईन्द्रबहादुर बानियाँले अर्को एम्बुलेन्स हस्तान्तरण गरेका छन् । 
स्वर्गीय पिता क्षेमबहादुरको स्मृतिमा थाहा नगरपालिका ६ स्थित बज्रबाराही स्वास्थ्यचौकीलाई प्रजातन्त्र दिवसमा मंगलबार एम्बुलेन्स हस्तान्तरण गरेका छन् । त्यसैगरी, संचालन खर्च बापत ५० हजार रुपैँया हस्तान्तरण गरेका छन् । बज्रबाराही स्वास्थ्यचौकी ब्यवस्थापन समितिका उपाध्यक्ष ईन्द्रबहादुर श्रेष्ठको सभाध्यक्षता एवं  बानियाँको प्रमूख आतिथ्यतामा कार्यक्रम  भएको हो । 
पिता क्षेमबहादुरको स्मृतिमा नेता बानियाँ, उहाँकी धर्मपत्नी दीपा पौडेल बानियाँ, छोरी दीक्षा बानियाँ लगायतले संयुक्त रूपमा स्वास्थ्यचौकी व्यवस्थापन समितिका उपाध्यक्ष तथा स्वास्थ्यचौकी प्रमुख एम्बुलेन्सको साँचो हस्तान्तरण गरेका थिए ।
कार्यक्रममा नेपाली कांग्रेसकी केन्द्रीय सदस्य महालक्ष्मी उपाध्याय डिना, अतिथिहरु थाहा नगरपालिकाका मेयर लवशेर विष्ट, नेपाली कांग्रेस थाहा नगर सभापति योगेन्द्रमान श्रेष्ठ, थाहा बज्रबाराही स्वास्थ्यचौकी प्रमुख सजिता पराजुलीले मन्तव्य व्यक्त गरेका थिए ।
केहीदिन अघि नेता बानियाँले पिताको स्मृतिमा राईगाउँ स्वास्थ्यचौकी र दाजु राजकुमार बानियाँको स्मृतिमा हेटौंडा उपमहानगरपालिका वडा नम्बर १८ को हर्नामाडी स्वास्थ्यचौकीलाई एम्बुलेन्स हस्तान्तरण गरेका थिए ।