बीउ विजन माग अनुसार उत्पादन हुन सकेन : थापा

१६ फागुन, हेटौँडा । बीउ विजन गुणस्तर नियन्त्रण केन्द्रका प्रमुख मदन थापाले नेपालमा बीउ विजन मागको आधारमा उत्पादन हुन नसकेको बताएका छन् ।
बीउ विजन गुणस्तर नियन्त्रण केन्द्रको आयोजना र नेपाल बीउ व्यवसायी सङ्घ जिल्ला समन्वय समिति मकवानपुरको संयोजन बीउ विजन व्यवासायीहरुका लागि बिहीबारबाट हेटौँडामा सुरु भएको तालिममा उनले नेपाल बीउ विजनमा आयातमा निर्भर रहेको बताए । कार्यक्रममा बीउको व्यापार, आयात, निर्यात, उत्पादन र प्रयोगशाला सञ्चालन गर्न अनुमतिपत्र आवश्यक पर्ने जानकारी गराइएको थियो । नेपाल बीउ व्यवसायी संघ जिल्ला समन्वय समिति मकवानपुरका अध्यक्ष हरिशरण अर्यालको अध्यक्षतामा भएको तालिमको शुभारम्भमा संघका केन्द्रीय सचिव विश्वराज बानियाँ, नेपाल पत्रकार महासंघ मकवानपुरका पूर्व अध्यक्षहरु राममणि दाहाल, भानुभक्त आचार्यलगायतको उपस्थिति रहेको थियो ।
तालिममा बीउ विजन गुणस्तर नियन्त्रण केन्द्रका वरिष्ठ बीउ विजन अधिकृत रमेश हुमागाईं, विकास खरेल र रमेश धितालले सहजीकरण गर्नु हुने भएको छ । बीउ विजन व्यवासायीहरुका लागि आयोजित तीन दिने बीउ विजन उत्पादन तथा व्यवस्थापनसम्बन्धी तालिममा मकवानपुर, चितवनलगायतका जिल्लाका ६२ जनाको सहभागिता रहेको छ ।