जनकल्याणद्वारा ३ सहकारी अवलोकन

फोटोः रुपेश दुलाल

२२ चैत, हेटौंडा । हेटौंडा-६ चौघडामा रहेको जनकल्याण बचत तथा ऋण सहकारी संस्था लिमिटेडले काभ्रे र दोलखाका दुई सहकारीको अवलोकन गरेको छ ।

सहकारीको बार्षिक कार्ययोजना अनुसार बिहिवार र शुक्रबार दुई सहकारीको अवलोकन भ्रमण गरेको हो । काभ्रेको पनौतिमा ४ वटा सहकारी एकीकरण भएर बनेको ज्योति मिर्मिरे सामुहिक बचत तथा ऋण सहकारी संस्थाका उपाध्यक्ष कान्छिमाया थापा, सचिव दिपकप्रसाद दाहाल र कार्यालय प्रमुख गोपाल दाहाल लगायतले सहकारी एकिकरणका अनुभव, यसका चुनौति र फाईदाको बारे अवगत गराएका थिए । त्यसैगरी, २ वटा सहकारी एकीकरण भएको दोलखाको चरिकोटस्थित हाम्रो जनकल्याण बचत तथा ऋण सहकारी संस्थाका अध्यक्ष रामचन्द्र बस्नेत, सचिव रामचन्द्र दुलाल, प्रमुख कार्यकारी अधिकृत दिपक बस्नेत, सूचना अधिकृत पर्वत न्यौपाने लगायतले संस्था एकीकरण, संस्थाका सेवा प्रवाह, शेयर सदस्यहरूलाई प्रोत्साहनका कार्यक्रम जस्ता विषयमा जानकारी दिएका थिए । त्यस्तै, चरिकोटमै रहेको १० वटा सहकारी मिलेर बनेको मिलिजुली बचत तथा ऋण सहकारी संस्थाका सहायक व्यवस्थाक रमेश सापकोटा र लेखा अधिकृत भीमसेन दाहाल सहकारीको गतिविधि, एक्सेस ब्रान्ड प्राप्त गर्न गरेका काम, अाफुले फरक क्रियाकलाप लगायतको बारेमा अवगत गराएका थिए ।

३ वटा सहकारी अवलोकनका क्रममा सहभागीले सदस्य प्रवर्द्धन, सदस्य हितका गतिविधिमा विविधता, निःशुल्क विमा लगायतको बारेमा जिज्ञासा राखेका थिए । जनकल्याणका अध्यक्ष हिमाल पौडेलको नेतृत्वमा गएको ३६ जनाको टोलिमा संचालक समिति, लेखा समिति, सल्लाहकार, शेयर सदस्य लगायतको सहभागिता रहेको छ । टोलिले विभिन्न पर्यटकीय क्षेत्रको समेत अवलोकन गरेको छ ।