अजोड इन्स्योरेन्सको शाखा हेटौँडामा स्थापना

२९ वैशाख, हेटौंडा । अजोड इन्स्योरेन्स लिमिटेडको ३० औँ शाखा हेटौँडामा स्थापना गरिएको छ ।
हेटौँडा शाखाको आइतबार प्रदेश ३ का आर्थिक मामिला तथा योजना मन्त्री कैलाशप्रसाद ढुङ्गेलले उदघाटन गर्दै प्रजातन्त्र प्राप्तिपछि बीमा कम्पनी लगानी सुरक्षाका लागि विश्वास सिर्जना गर्ने माध्यम बनेको बताए । सरकार औद्योगिकीकरणका लागि आवश्यक सुविधा दिन तयार रहेको बताए ।
कार्यक्रममा प्रदेश ३ का प्रदेश मामिला समितिका सभापति माधवप्रसाद पौडेलले सरकारले उद्योगीका लागि लगानीमैत्री वातावरण निर्माण गर्न लागेको बताए ।
कम्पनी नायव प्रमुख कार्यकारी अधिकृत सुरेन्द्र थापाले कार्यक्रममा कम्पनीले ३५ हजार बीमालेख जारी गरेको भन्दै कम्पनीको कुल लगानी ८० करोड रुपियाँ पुगेको जानकारी दिए ।
कम्पनीका हेटौँडा शाखाका प्रबन्धक बद्रीनाथ शर्माले कम्पनीले वैशाख १ गतेबाट ग्राहकहरुका लागि ३६५ दिन नै बीमा सेवा उपलब्ध गराउन थालेको बताउँदै छिटो छरितो र विश्वसनीय सेवा प्रदान गर्ने प्रतिबद्धता जनाए । 
कम्पनीका सञ्चालक राजेन्द्रप्रसाद कायस्थको अध्यक्षतामा भएको कार्यक्रममा कम्पनीका संस्थापक मधुवनप्रसाद पौडेल, नेपाल औद्योगिक क्षेत्र उद्योग महासंघका निवर्तमान अध्यक्ष माधव अधिकारी लगायतले मन्तव्य व्यक्त गरेका थिए ।