कान्तिलोकपथको काम सानोपोखराबाट हुने

२३ मंसिर, हेटौँडा । निर्माणधिन कान्तिलोकपथको काम अब सानोपोखराबाट हुने भएको छ । बजार क्षेत्रमा धेरै धुलो उडेको भन्दै कान्तिलोकपथ संघर्ष समितिले जिल्ला प्रशासन कार्यालयमा ध्यानाकर्षण गराएपछि प्रशासनमा छलफल भएको हो ।

प्रशासन कार्यालयमा भएको छलफलमा सानोपोखराबाट कान्तिलोकपथको स्तरोन्नतिको काम हुने सहमति भएको हो । संघर्ष समिति, प्रशासन कार्यालय, सडक निर्माण वानीयाँ निर्माण सेवा सहितको सरोकारवालाको बैठकले हेटौँडाको सानोपोखराबाट स्तरोन्नतिको काम थाल्ने, सडकमा धुलो नियन्त्रणको लागि पानी हाल्ने तथा सडक निर्माणका क्रममा खानेपानी पाईप र विद्युतिय पोलको व्यवस्थापनका लागि सम्बन्धित निकायमा आवश्यक पहल गर्ने निर्याण् भएको छ ।

छलफलमा निर्माण कम्पनीले खानेपानी पाईप र विद्युतिय पोलको व्यवस्थापनमा सम्बन्धित निकायबाट समन्वय हुन नसक्दा समस्या परेको जानकारी दिएको थियो । पाईप व्यवस्थापनका लागि लाखौं रकम आवश्यक पर्ने भएपनि खानेपानी बोर्डसँग बजेट अभाव रहेको बताईएको छ । बैठकमा संघर्ष समितिका संयोजक रबिन्द्र पोखरेल, निर्माण सेवाका ऋषिराज बानियाँ, प्रमुख जिल्ला अधिकारी नारायणप्रसाद शर्मा, मकवानपुर प्रहरी प्रमुख वसन्तकुमार लामा लगायतको उपस्थिति रहेको थियो ।

बानियाँ निर्माण सेवाले हेटौँडा–७ न्यूरेनी, हेटौँडा–६ चौघडा लगायतका क्षेत्रमा कान्तिलोकपथको काम गरिरहेको छ । छिटै नै कालोपत्रे गर्ने लक्ष्यका साथ काम गरिरहेको विएनएसको दावि छ ।

तस्विरहरु : हेटौँडा–६ चौघडामा कान्तिलोकपथमा ढल विस्तार हुँदै । तस्विर सौं. उत्सव चौलागाई ।