बानियाँको पहलमा दर्दरा-बसन्तपुर सडकमा स्ल्याब 

२९ जेठ, हेटौँडा । नेपाली कांग्रेस मकवानपुर सभापति एवम् ३ नम्बर प्रदेश संसदीय दलका नेता ईन्द्रबहादुर बानियाँको पहलमा मनहरी गाउँपालिकाको वडा नम्बर ५ स्थित दर्दरा बसन्तपुर सडक खण्डमा ढलानको काम भएको छ । बानियाँको पहलमा उपलब्ध ५० लाख रुपैयाँको बजेटमा करिब ५ सय मिटर बाटो स्ल्याब ढलान भएको हो । 
मनहरी गाउँपालिकाको केन्द्र रजैया हुँदै बसन्तपुर डिल्लीपुर आवतजावत गर्ने स्थानीयको सहजताको लागि बाटो स्ल्याब ढलान गरिएको दर्दरा बसन्तपुर डिल्लीपुर सडक स्तरीकरण उपभोक्ता समितिका अध्यक्ष कृष्णबहादुर स्याङ्तानले बताए । बर्षायाममा हिलो र अन्य समयमा धुलो उड्ने बाटोमा स्ल्याब भएपछि स्थानीयलाई आवतजावतमा सहज भएको अध्यक्ष स्याङ्तानले दावी गरे । बजेटबाट ६ मिटर चौडाई र २० सेन्टिमिटर मोटाईको करिब पाँचसय मिटर बाटो ढलान गरिएको छ । ‘स्टिमेटमा ४७० मिटर ढलान गर्नुपर्ने उल्लेख भएपनि हामीले करिब ५ सय मिटर सडक स्ल्याब ढलान गरेका छौँ, उनले भने, ‘नेता ईन्द्र बानियाँले चुनावको बेला गर्नुभएको प्रतिबद्धता अनुसार भएको सडक स्तरोन्नतिको काम भएको भन्दै यस क्षेत्रको अन्य सडक स्तरीकरणको लागि पनि आवश्यक सहयोग हुने अपेक्षा गरेका छौं ।’
योजनालाई तोकिएकै मितिमा तोकिएकै ढाँचामा सम्पन्न गर्न ५ नम्बर वडाबासीको योगदान रहेको स्थानीय शिवराज उप्रेतीले जानकारी दिए । स्ल्याब ढलानबाट स्थानीय करिब एक हजार घरधुरी प्रत्यक्ष लाभान्वित भएको उनले दावी गरे । प्रदेशसभा सदस्य ईन्द्रबहादुर बानियाँले निर्वाचनको समयमा जनताको सामु गरेको प्रतिबद्धता अनुसार आफ्नो पहलमा स्ल्याब ढलानको लागि ५० लाख रुपैयाँ बजेट उपलब्ध गराएको जानकारी दिँदै आवश्यकताको आधारमा बजेट उपलब्ध गराउँदै जाने प्रतिबद्धता जनाए ।
यस्तै ५ नम्बर वडाको बसन्तपुरमा मनहरी गाउँपालिकाबाट स्वीकृत बजेटमा नाली निर्माण तथा बाटो स्तरीकरणको काम भैरहेको छ । गाउँपालिकाको करिब २३ लाख रुपैयाँको योजनामा काम भैरहेको हो । स्थानीय उपभोक्ता समितिले बाटो निर्माणको काम धमाधम अघि बढाइरहेको छ ।