कृषि तथा सहकारी मन्त्रालय र कृषि विकास बैंकबिच १४ बुँदे सम्झौता

१४ साउन, हेटौँडा । कृषि पेशालाई व्यवसायिकरण गराउन प्रदेश ३ सरकारको भूमि व्यवस्था, कृषि तथा सहकारी मन्त्रालय र कृषि विकास बैंकविच कृषकलाई सहुलियतपूर्ण ऋण तथा अनुदान उपलब्ध गराउँने विषयमा सम्झौता भएको छ ।
समझदारी पत्रमा मन्त्रालयको तर्फबाट सचिव डाक्टर योगेन्द्र कुमार कार्की र कृषि विकाश बैकको तर्फबाट बैंकका प्रमुख कार्यकारी अधिकृत अनिलकुमार उपाध्यायले हस्ताक्षर गरेका छन् ।
१४ बुँदे समझदारी पत्रमा हस्ताक्षर भएसँगै प्रदेश ३ कृषिलाई व्यावसायीक रुपमा काम गर्न चाहनेहरुका लागि सहज हुने भएको छ ।
कृषि प्राबिधिक, वेरोजगार तथा विदेशबाट फर्किएका युवाहरुलाई सहुलियतपूर्ण कृषि ऋण उपलव्ध गराउनका लागि बैकसंग समझदारी गरिएको हो । 
प्रदेशका कृषक, कृषक समुह, सहकारी एबं उद्धमी व्यावसायीहरुलाई प्रवाह गरिने अनुदान कृषि विकास बैक मार्फत हुने व्यवस्था समेत गरिएको छ । 
कार्यक्रममा प्रदेश ३ का मुख्यमन्त्री डोरमणी पौडेल, भूमि व्यवस्था, कृषि तथा सहकारी मन्त्री दावा दोर्जे लामा, आर्थिक मामिला तथा योजनामन्त्री कैलाश ढुङ्गेल, नीति तथा योजना आयोगका सदस्य श्याम बस्नेत, प्रमुख सचिव आनन्दराज ढकाल लगायतकाको उपस्थिती रहेको थियो ।