कान्ति लोकपथमा बजेट अभाव हुँदैन : मन्त्री लेखक

११ पुस, हेटौंडा । भौतिक पूर्वाधार तथा यातायात व्यवस्था मन्त्री रमेश लेखकले कान्तिलोकपथ अायोजनामा बजेट अभाव नहुने प्रतिवद्धता व्यक्त गरेका छन् ।

मन्त्रालय र संसद अन्तरगतको विकास समितिले गरेको कान्तिलोकपथ अायोजनाको स्थलगत अनुगमनपछि हेटौंडामा भएको अन्तरक्रियामा बोल्दै मन्त्री लेखकले तोकिएकै समयमा काम सम्पन्न गर्न पर्याप्त बजेट उपलब्ध हुने बताए ।

उनले ट्रयाक खुलेको ५८ बर्षपछि यसलाई राज्यले प्राथमिकता राखेर २०७१ सालदेखि पर्याप्त बजेट उपलव्ध गराएको बताए । उनले अायोजना अाव ०७४/०७५ भित्र सम्पन्न गर्न बजेट र प्राविधिक पक्षलाई मन्त्रालयले सुष्म ढंगले नियादिरहेको उनको भनाई थियो ।

कार्यक्रममा विकास समितिका सभापति रविन्द्र अधिकारीले अायोजना समयमै सम्पन्न गर्न मन्त्रालय, अायोजना र निर्माण कम्पनीको तदारुकता अावश्यक रहेको बताए । कार्यक्रममा अायोजना प्रमुख देवेन्द्र साहले अायोजना समयमै सम्पन्न गर्न हेटौंडा र ठिंगनमा दुईवटा ईकाई कार्यालय स्थापना गरिने बताए । उनले विद्युत पोल र खानेपानी पाईप स्थानान्तरणमा केही समस्या रहेपनि समन्वय गरेर समाधान गरिने बताए ।

कार्यक्रममा कान्तिलोकिथको मापदण्ड, सरकारी कार्यालयबीचको समन्वय लगायतका बारेमा सहभागीले जिज्ञासा राखेका थिए । कार्यक्रम सांसदहरू उदयशम्सेर राणा, अनन्त पौडेल, राजाराम स्याङ्तान, रामकुमार भट्टराई लगायतको सहभागिता रहेको थियो ।