२५ मिटर : हेटौँडामा अब के हुन्छ ?

२८ साउन, हेटौँडा । डिभिजन सडक कार्यालयले सडक विस्तारका क्रमलाई अघि बढाईरहेको बेला अचानक ३ नम्बर प्रदेशका मूख्यमन्त्री डोरमणी पौडेलको अभिव्यक्ति सार्वजनिक भयो । 
दुई दिन अघि जिल्ला समन्वय समितिको चौथो जिल्ला सभामा उनले हेटौंडामा २५ मिटर हैन १६ मिटर सडक विस्तार हुने उद्घोष गरे । २५ मिटर सडक भत्किए आफुले समेत ‘कुम्लो’ बोकेर हिड्नुपर्ने अभिव्यक्ति दिए । उनले बाईपास बनाउन बजेट विनियोजन भएको समेत बताए । १६ मिटर सडक विस्तार हुने हो भने आफुले नै घर भत्काउन अघि बढ्ने पनि बताए । यसरी हेर्दा मुख्यमन्त्रीले २५ मिटर सडक विस्तारलई आफ्नो प्रतिष्ठासंग जोडेर हेरेको प्रष्ट हुन्छ ।
तर यता राजमार्ग नै विस्तार गरिरहेको डिभिजन सडक कार्यालयले भने बाराको अमलेखगञ्ज्देखि ३ नम्बर पुलसम्म र मकवानपुरको लोथरदेखि मनहरीसम्म सडक विस्तार गर्ने क्रममा २५/२५ मिटरलाई नै मापदण्ड बनाएर संरचनाहरु भत्काईरहेको छ । ‘यस्तो अवस्थामा हेटौँडामा अब के हुन्छ ?’–सर्वसाधारणहरु अन्यौलमा छन् । केहीले मूख्यमन्त्री हेटौँडा बजारको मात्रै मूख्यमन्त्री नभएर प्रदेशकै मूख्यमन्त्री भएकाले यस्तो अभिव्यक्ति दिनु गैरजिम्मेवारीपन भएको बताउँछन् भने केहीले बजार जोगाउन सहि अभिव्यक्ति भनिरहेका छन् ।
कानूनी अड्चन टुंगो लगाएर सडक विस्तार गर्ने कामलाई गति दिने तयारी गरिरहेको डिभिजन सडक कार्यालय पनि मूख्यमन्त्रीको कडा अभिव्यक्तिले ‘पर्ख’ अवस्थामा पुगेको छ । मनहरीसम्म आफ्नो काम अघि बढाएको कार्यालय अहिले हेटौँडातर्फ अघि बढ्न नसक्नु मूख्यमन्त्रीकै अभिव्यक्तिको असरको रुपमा लिईएको छ ।
सडक विस्तारबारे प्रतिक्रिया लिन खोज्दा कार्यालय प्रमुख सुमन योगेश फोन ‘रसिभ’ गर्दैनन् भने सूचना अधिकारी जयराम अधिकारीको मोवाईल केहि दिनदेखि स्विच अफ छ । यसले उनीहरु रक्षात्मक अवस्थामा पुगेको त हैन भन्ने प्रश्न उव्जिएको छ ।