श्रमिक दुग्ध सहकारीमा हरि हुमागाई

२९ पुस, हेटौंडा । मकवानपुरगढी-४ शिखरकटेरीमा रहेको श्रमिक दुग्ध उत्पादक सहकारी संस्था लिमिटेडको अध्यक्षमा हरिकुमार हुमागाई चयन भएका छन् । संस्थाको शुक्रबार सम्पन्न २३ औं बार्षिक साधारणसभाले हुमागाईको अध्यक्षतामा ९ सदस्यीय नयाँ संचालक समिति सर्वसम्मत चयन गरेको हो । समितिको उपाध्यक्षमा मानकुमारी पन्त र सदस्यहरुमा गौतम थिङ, रामहरी बुढाथोकी, घगराज न्यौपाने, विविमाया रुम्बा, सानुकाजी बजगाई, विष्णु चौरेल, हेमनाथ न्यौपाने चयन भएका छन् ।

सभामा संस्थाका अध्यक्ष ईन्द्रबहादुर गोलेले संस्थागत प्रतिवेदन, लेखा समिति संयोजक राजबिर मोक्तानबाट लेखा परिक्षण प्रतिवेदन र चालू आव ०७३र०७४ का लागि १ करोड ४८ लाख ४५ हजार ४ सय १८ रूपैयाँको अनुमानित बजेट प्रस्तुत गरेका थिए । कार्यक्रममा संस्थाको विकासमा सहयोग पुर्याउने कर्णबहादुर थिङ, पूर्व अध्यक्ष बीरबहादुर गोले हरिकुमार हुमागाई, कृष्णप्रसाद हुमागाई, चुडामणी घिमिरे र खिलनाथ तिमल्सिनालाई सम्मान गरिएको थियो । त्यसैगरी, दूध विक्रितर्फ पहिलो हुने विष्णुप्रसाद चौरेल, दोस्रो हुने कृष्णबहादुर भोलुन, तेस्रो हुने चुडाबहादुर घिमिरे र सान्त्वना पुरस्कार गौतम थिङ, गुणस्तरीय दूध विक्रि गर्ने चक्रबहादुर दोङ, कृष्णबहादुर भोलुन, सफा दूध विक्रि गर्ने विविमाया रूम्बा, ईन्द्रबहादुर गोलेलाई सम्मान गरिएको थियो ।

जिल्ला दुग्ध उत्पादक सहकारी संघका संचालक सदस्य अर्जुनप्रसाद गौतमको प्रमुख आतिथ्यता एवम् संस्थाका अध्यक्ष ईन्द्रबहादुर गोलेको अध्यक्षतामा भएको कार्यक्रममा चण्डिका मावि स्रोतकेन्द्रका स्रोतब्यक्ति दोर्जे लामा स्याङ्तान, संस्थाका पूर्व अध्यक्ष बीरबहादुर गोले, बंशगोपाल माविका अध्यक्ष रामप्रसाद पुडासैनी, कुर्ले कृषि सहकारी संस्थाका अध्यक्ष कृष्णप्रसाद हुमागाई लगायतले मन्तव्य व्यक्त गरेका थिए ।