शिक्षा क्षेत्रमा राजनीति बढि भयो : मूख्यमन्त्री पौडेल

३ मंसिर, हेटौँडा । ३ नम्बर प्रदेशका मूख्यमन्त्री डोरमणी पौडेलले शिक्षा क्षेत्रमा राजनीति बढि हुने गरेको बताएका छन् । हेटौँडा–१८ फुर्केचौरमा रहेको गोरक्षनाथ माविलाई प्राविधिक शिक्षालय बनाउनका लागि मंगलबारबाट शुरु भएको श्रीमद् भागवत सप्ताह ज्ञान महायज्ञ उद्घाटन गर्दै मूख्यमन्त्री पौडेलले शैक्षिक क्षेत्रमा राजनीति बढेको भन्दै चिन्ता व्यक्त गरेका हुन् । 
उनले शिक्षकका पेशागत संगठनहरु शिक्षकहरुको हक अधिकारको संरक्षणका लागि गठन भएपनि अहिले त्यसलाई राजनीति गर्ने स्थानको रुपमा विकास गर्न खोजिएको भन्दै शिक्षकहरुले राजनीति नभई गुणस्तरीय शिक्षामा ध्यान दिनुपर्ने बताए । विद्यालयमा भौतिक गुणस्तर मात्रै नभई शैक्षिक गुणस्तरमा पनि सुधार हुनुपर्नेमा जोड दिंदै उनले प्रदेश सरकार त्यसतर्फ अग्रसर भएको बताए । उनले प्रदेश सरकारले प्रत्येक गाउँपालिकामा प्राविधिक शिक्षालयको अवधारणा अघि सारेर काम गरिरहेको समेत बताए । 
कार्यक्रममा महायज्ञ मूल समारोहका संयोजक एवं ३ नम्बर प्रदेशको प्रमुख प्रतिपक्ष दलका नेता इन्द्रबहादुर बानियाँले विद्यालयको शैक्षिक एवं भौतिक सुधारबाटै सामाजिक रुपान्तरणको काम अघि बढ्ने बताए । उनले यसका लागि सबैले एकजुट भएर अघि बढ्नुपर्नेमा जोड दिंदै विकासमा सबै एकमत हुनुपर्ने बताए । 
कार्यक्रममा प्रदेशसभा सदस्य प्रेमबहादुर पुलामी, विद्यालय व्यवस्थापन समितिका अध्यक्ष शैलेन्द्रराज बानियाँ लगायतले मन्तव्य व्यक्त गरेका थिए । सप्ताह महायज्ञमा पण्डित दिनबन्धु पोखरेलले कथावाचन गर्ने छन् ।

यो पनि पढ्नुस्
हेटौंडा १८ मा रहेको गोरक्षनाथ माविमा मंसिर ३ गतेबाट महायज्ञ हुने