पूर्वप्रधानमन्त्री भट्टराई र सांसदहरु मुआव्जा माग्दै धर्नामा

५ मंसिर, गोरखा । पूर्वप्रधानमन्त्री डा.बाबुराम भट्टराई र सांसदहरु मुआव्जाको माग गर्दै धर्नामा बसेका छन् ।
बुढीगण्डकी आयोजनास्थल आरुघाट बजार, धादिङको खहरे र गोरखाको आर्खेत क्षेत्रको मुआब्जा तत्काल तोक्न माग गर्दै उनीहरु धर्नामा बसेका हुन् ।  पूर्वप्रधानमन्त्री तथा गोरखा २ का सांसद बाबुराम भट्टराई, राष्ट्रिय सभामा प्रमुख प्रतिपक्ष दलका नेता सुरेन्द्रराज पाण्डे, गण्डकी प्रदेश सांसद प्रकाशचन्द्र दवाडीसहित स्थानीय जिल्ला प्रशासन कार्यालय गोरखामा धर्नामा बसेका छन् । प्रमुख जिल्ला अधिकारी देवेन्द्र लामिछानेले मुआब्जा तोक्न आलटाल गरेपछि दवाव दिन धर्ना शुरु गरेको भट्टराईले बताए । 
पटक पटक सबै निकायमा मुआव्जाका लागि आग्रह गर्दा समेत वेवास्ता हुँदा स्थानीय मारमा परेको कांग्रेस सांसद सुरेन्द्रराज पाण्डेले बताए । उनले ५ बर्षदेखि जनताको जग्गा रोक्का राख्दा समस्या परेको भएपनि मुआव्जा दिएर समस्या समाधानमा कसैले चासो नदिएको भन्दै आक्रोश व्यक्त गरे । 
माग पुरा नभए शुक्रवार जिल्ला प्रशासन कार्यालयका धादिङमा धर्ना दिने र आइतवार बुढीगण्डकी आयोजना कार्यालय घ्याल्चोकमा धर्ना दिने सरोकार समिति आरुघाटका संयोजक दिनेशकुमार ढकालको भनाई छ । पटक पटक जानकारी गराउँदा समेत वेवास्ता गरेकाले जनप्रतिनिधिसहित धर्नामा बस्नु परेको उनको भनाई छ ।