चौघडा क्षेत्रमा भ्रमण बर्ष लक्षित गतिविधि हुने

८ मंसिर, हेटौँडा । हेटौँडा–६ चौघडा क्षेत्रमा नेपाल भ्रमण बर्ष २०२० लाई लक्षित गरी विभिन्न कार्यक्रम हुने भएको छ ।
चौघडामा रहेको गुप्तेश्वरी टोल विकास संस्थाको १७ औं बार्षिक साधारणसभामा बोल्दै वडा अध्यक्ष अर्जुनप्रसाद चौलागाईले सरकारले घोषणा गरेको भ्रमण बर्ष सफल बनाउन चौघडा क्षेत्रमा प्रवद्र्धनात्मक कार्यक्रम गर्ने बताएका हुन् । 
सरकारले घोषणा गरेको भ्रमण बर्ष सफल बनाउन वडा तहसम्मको भुमिका महत्वपूर्ण हुने भन्दै उनले पर्यटकीय क्षेत्र मकवानपुरगढीको प्रवेशद्वारको रुपमा परिचित चौघडामा विशेष अभियान संचालन गर्ने बताए । उनले चौघडा क्षेत्रलाई सरसफाईयुक्त बनाउने र सडक दायाँबायाँ हरियाली प्रवद्र्धन र फूलैफूलले सजाउने तयारी रहेको बताए ।
कान्तिलोकपथ अन्तरगत हेटौँडा वडा नम्बर ६ को सिमाना न्यूरेनीदेखि रक्षादेवी टोल क्षेत्रसम्म दुबैतर्फ हरियाली बनाउन र फूलका विरुवा रोप्न टोल विकास संस्थाहरुमार्फत काम अघि बढाउने उनको भनाई छ । यसका लागि वडा कार्यालयले बजेट समेत उपलव्ध गराउने जानकारी दिए । यसैगरी हेटौँडा–६ मा रहेको रानी सामुदायिक वन उपभोक्ता समूहले चौघडामा लोपोन्मुख बन्यजन्तु सालकको प्रतिमा स्थापना गर्ने भएको छ ।
भेलामा संस्थाकी अध्यक्ष गोमा लामिछानेले संस्थागत प्रतिवेदन र कोषाध्यक्ष नानीमाया रुम्बाले आर्थिक प्रतिवेदन प्रस्तुत गरेका थिए । टोल विकास संस्थाकी अध्यक्ष लामिछानेको सभाध्यक्षतामा भएको भेलामा टोल विकास संस्था नगरसमितिका सचिवालय सदस्य विष्णुप्रसाद ढुंगाना, वडा समन्वय समितिका अध्यक्ष केशव धिताल, संचारकर्मी भीमसेन पौडेल, संस्थाकी सदस्य अमुना सापकोटा लगायतले मन्तव्य व्यक्त गरेका थिए ।