चौकीटोल क्षेत्रमा डोजर चल्यो, वडाध्यक्ष भन्छन् ‘राम्रो काम’

८ मंसिर, हेटौँडा । हेटौंडा बजार क्षेत्रको २५ मिटर सडक विस्तार हुने वा नहुने भन्ने बारेमा चर्चा चलिरहँदा हेटौँडा–१ चौकीटोल क्षेत्रमा डोजर चल्न शुरु भएको छ । 
३ नम्बर प्रदेश सरकारको १३ करोड रुपैयाँ लगानीमा चौकीटोलदेखि कर्रा पुलसम्मको क्षेत्रमा सडक विस्तारका लागि डोजर चल्न शुरु भएको हो । भौतिक पूर्वाधार विकास मन्त्रालयअन्तर्गतको पूर्वाधार विकास कार्यालय चितवनले कार्यान्वयन गर्ने गरी सो कामको ठेक्का गजुरमुखी शिवशक्ति निशान जेभीले पाएको छ । 
प्रदेश सरकारको लगानीमा चौकीटोलदेखि हेटौंडा–१० कर्रापुलसम्म राप्तिखोला किनारमा २.३ किलोमिटर सडक विस्तारको काम शुरु भएको बताउँदै हेटौंडा–१ का वडा अध्यक्ष सविन न्यौपानेले सडक विस्तारले चौकीटोलदेखि कर्रापुलसम्मको बस्ति, अस्पताल लगायतका भौतिक संरचनाको सुरक्षामा सहयोग पुग्ने बताए । उनले यसले बजार क्षेत्रमा हुने सवारी चाप व्यवस्थापनमा पनि महत्वपूर्ण योगदान दिने भएकाले सडक विस्तार राम्रो काम भएको बताए ।
उनले यो क्षेत्र सधैं राप्ति खोलाको बाढिको चपेटामा पर्ने भएकाले ड्याम बनाई सडक विस्तार हुँदा बस्ती जोगाउन पनि फलदायी हुने बताए । यसअघि पटक पटक बस्ति संरक्षणका लागि विभिन्न निकायमा पुगेको भन्दै उनले अहिलेको कामले बस्ति जोगिनुका साथै यातायात पूर्वाधार तयार हुने बताए । उनले कामको गुणस्तरीयताको निगरानीमा वडा कार्यालय र त्यस क्षेत्रका स्थानीय सक्रिय रहेको बताए ।