लकडाउनमा विद्युत माग बढ्यो, कुलेखानी नियमित संचालन

२९ चैत, हेटौंडा । नेपाल विद्युत प्राधिकरणको व्याकअप मानिने मकवानपुरस्थित कुलेखानी जलविद्युत आयोजना संचालनमा रहेको छ । लकडाउनमा विद्युतको माग धान्न कुलेखानी जलविद्युत आयोजनाको तीनवटै युनिट संचालनमा रहेको हो ।
विहान र बेलुका विद्युतको उच्च माग भएको समयमा विद्युत भार व्यवस्थापनका लागि संचालन हुने गरेको कुलेखानी लकडाउनमा पूर्ण क्षमतामा संचालनमा रहेको कुलेखानी प्रथमका प्रमुख रामकुमार यादवले जानकारी दिए । ‘आवश्यकताको आधारमा अहिले चौविसै घण्टा संचालन गरिन्छ ।’–उनले भने–‘सामान्य अवस्थामा भन्दा लकडाउनको अवधीमा दोव्वर समय संचालन भईरहेको छ ।’
तीनवटै युनिट गरी १ सय ६ मेगावाट क्षमताको आयोजना अहिले आवश्यकताका आधारमा चौविसै घण्टा संचालनमा रहेको छ । लकडाउनमा देशैभरी विद्युतको माग बढिरहेकाले आयोजना दैनिक ५ सय देखि साढे ५ सय मेगावाट आवर संचालनमा छ । रनअफ रिभरमा आधारित आयोजनाहरुको उत्पादन घटेकाले लोड व्यवस्थापनका लागि कुलेखानी संचालनमा ल्याउनुपरेको छ । 
नियमित रुपमा आयोजना संचालनमा ल्याईएपछि इन्द्रसरोबर जलासयको सतह दैनिक सरदर १० सेन्टिमिटरका दरले घटेको छ । लकडाउनको अवधीमा २ मिटर सतह घटेको आयोजनाले जनाएको छ । अहिले जलाशयमा १५ सय १३ दशमलब ६३ मिटर पानी छ ।