‘समकालिन नेपाली राजनीति धनमुखी’

३ फागुन, हेटौँडा । समकालिन राजनीति धनमुखी हुँदै गएको विहिबार हेटौँडामा आयोजित कार्यक्रमका वक्ताहरुले बताएका छन् । जनताका लागि भन्दै राजनीति गर्ने प्रतिवद्धता गरेकाहरु नै जनमुखी हुन नसकेको उनीहरुको भनाई हो ।
विन्दावासिनी मिडिया प्रालिद्वारा सञ्चालित रेडियो थाहा सञ्चार ९९.६ मेगाहर्जको १० औँ बार्षिकोत्सवको साताव्यापी कार्यक्रम अन्तर्गत गरिएको थाहा दर्शनको बारेमा ‘समकालिन राजनीति कति जनमुखी’ विषयक अन्तरक्रिया कार्यक्रमका वक्ताले यस्तो बताएका छन् । अहिलेका राजनीति मनमुखी, धनमुखी भएको समेत उनीहरुले आरोप लगाए । कार्यक्रममा बोल्दै प्राध्यापक डाक्टर गोविन्दशरण उपाध्यायले अहिलेको राजनीति जनमुख हुन सके देशले काँचुली फेर्ने दावि गरे । उनले रुपचन्द्र विष्टलाई नेपालको दोस्रो बुद्धको संज्ञा दिंदै उहाँको दर्शनको अनुसार गर्न अहिलेका राजनीतिज्ञलाई सुझाव दिए । महाकवी लक्ष्मीप्रसाद देवकोटा, सन्तनेता कृष्णप्रसाद भट्टराई र रुपचन्द्र विष्ट त्रिमुर्ति रहेको भन्दै उनीहरुले आप्mनो निम्ति नभई जनताको हितमा राजनैतिक गरेको बताए ।
रेडियोकी अध्यक्ष अस्मिता सुमार्गीको अध्यक्षतामा भएको कार्यक्रममा रेडियोका संचालक अरुणराज सुमार्गी, संस्कृतिविद् रामचन्द्र आचार्य फुर्सदी, रुपचन्द्र विष्टका अनुयायी धर्मराज राजथला, राजनीतिज्ञ सिताराम वर्तौला, सुवर्णध्वज गोतामे, निरञ्जन अधिकारी, सुकदेव रायमाझी, भिमसेन पौडेल विष्णुलाल श्रेष्ठ लगायतका वक्ताहरुले रुपचन्द्र विष्टको जनमुखी राजनीतिबारे प्रकाश पारेका थिए । कार्यक्रममा रेडियोले साप्ताहिक रुपमा रुपचन्द्र विष्टको बारेमा रेडियो कार्यक्रम उत्पादन गर्ने प्रतिवद्धता समेत गरिएको छ । रेडियोले शुक्रबार रक्तदान कार्यक्रम गर्दैछ ।