हेटौँडामा राष्ट्रिय खेलकुद तथा व्यापार महोत्सवको तयारी तिब्र

२१ कार्तिक, हेटौँडा । हेटौँडामा मंसिर २ देखि १३ गतेसम्म हुन लागेको राष्ट्रिय खेलकुद तथा व्यापार महोत्सवको तयारी तिब्र पारिएको छ । सुमन भोम्जन स्मृति खेलकुद प्रतिष्ठानले आइतबार पत्रकार सम्मेलन गरी राष्ट्रिय खेलकुद तथा व्यापार महोत्सव बारे जानकारी दिएको हो ।

हेटौंँडा–१० स्थित भुटनदेवी बसपार्क टिसिएनमा ११ दिनसम्म हुने महोत्सवमा ३ सय ५० वटा स्टल रहने मूल आयोजक समिति संयोजक भेष खड्गीले बताए । महोत्सवमा म्याराथन, तेक्वान्दो र कबड्डी प्रतियोगिताको राष्ट्रिय प्रतियोगिता, सशस्त्र प्रहरी र ढोरपाटन क्लवबीच मैत्रीपूर्ण महिला भलिबल, शारीरिक सुगठनको जिल्लास्तरीय खेल प्रर्दशनी हुनेछ । महोत्सवमा राष्ट्रिय तथा अन्तराष्ट्रियस्तरमा विजेता बन्न सफल खेलाडिहरुको सम्मान, किवि फलको विशेष प्रर्दशन, सिमान्तकृत तथा लोपोन्मुख राउटे जातिको स्टल, नृत्य, गायन, चित्रकला र नाटक विधाको प्रतिष्पर्धा हुने ‘हेटौँडा गट ट्यालेन्ट’ प्रतिष्पर्धा हुने आयोजकले जनाएको छ ।

२ लाख ५० हजार दर्शकले अवलोकन गर्ने महोत्सवमा १० करोड रुपैँया कारोबार हुने आयोजकको दावि छ । प्रतिष्ठानले गर्दै आएको हेटौँडा गोल्ड कपलाई आर्थिक सहयोग जुटाउन महोत्सव आयोजना गरेको हो । पत्रकार सम्मेलनमा प्रतिष्ठानका महासचिव सविन न्यौपाने, जिल्ला खेलकुद विकास समितिका अध्यक्ष माधव तिमल्सिना, प्रचारप्रसार संयोजक गणेश दर्पण अधिकारी लगायतले महोत्सवले जिल्लाको खेलकुद र आर्थिक क्षेत्रको प्रवद्र्धनमा सहयोग गर्ने भएकाले सबैको सहकार्य आवश्यक रहेको बताए ।