बजेट : अन्य दलको विरोध, सत्तापक्षको बचाउ

१ असार, हेटौँडा । ३ नम्बर प्रदेशमा आइतबार प्रस्तुत भएको आव ०७६/०७७ को बजेटबारे अन्य दलले विरोध गरेका छन् ।

प्रदेशसभा सदस्य रमेश पौड्यालले गतबर्षको झैं यो बर्ष बजेट कार्यान्वयनको आधार नभएको बताए । निर्वाचन क्षेत्र पूर्वाधार कार्यक्रममले सांसदहरुलाई वडा अध्यक्ष बनाउने ढंगले आएको र शक्ति पृथकिकरणको सिद्धान्त विपरित आएको बताए । प्रदेशसभा सदस्य रिना गुरुङले ल्याउनुपर्ने बाध्यताका कारण बजेट ल्याईएको र कुनै नयाँ कार्यक्रम नभएको बताईन् । उनले दुई÷चार सय कार्यकर्ता भर्ति गर्ने उद्देश्य बजेटमा छ । प्रदेश गौरवका योजनामा तोकेर बजेट विनियोजन नहुनु दुर्भाग्य भएको बताईन् ।
प्रदेशसभा सदस्य निमा लामाले बजेटमा नयाँ कुरा नभएको बताए । उनले बजेटले उत्साह दिन नसकेको, पुरानोलाई निरन्तरता दिएको भएपनि यसपटक पनि बजेट खर्चको सुनिश्चितता नभएको बताए । प्रदेशसभा सदस्य रिता माझीले बजेटले युवा बेरोजगारीको समस्यालाई सम्बोधन गर्न नसकेको, कार्यकर्ता भर्तिको सोचबाट आएको र धार्मिक एवं सांस्कृतिक सम्पदाको जोर्गेनामा उपेक्षा गरेर आएको बताए ।
सत्तापक्षको बचाउ
नेकपाका मूख्य सचेतक रामेश्वर फुँयालले बजेटले प्रदेश समृद्धिको स्पष्ट खाका कोरेको बताएका छन् । उनले कृषिमा जोड दिएर व्यवसायिक बनाउन खोजेको, पर्यटनमा विशेष महत्व दिएको बताए । बाम गठबन्धनको घोषणापत्रको परिकल्पना पुरा गर्ने खालको आएको बताए । प्रदेश पूर्वाधार विकास कार्यालय सकारात्मक सोचका साथ आएको उनको भनाई छ ।